ശ്രീനാഥ് ഭാസി നായകനായ പുതിയ ചിത്രമാണ് പടച്ചോനെ ഇങ്ങള് കാത്തോളി. ബിജിത് ബാല സംവിധാനം ചെയ്ത ചിത്രത്തില്‍ ആന്‍ ശീതള്‍, സരസ ബാലുശ്ശേരി, ഗ്രേസ് ആന്റണി, നിര്‍മല്‍ പാലാഴി, ഹരീഷ് കണാരന്‍, ദിനേശ് പ്രഭാകര്‍ തുടങ്ങി നിരവധി അഭിനേതാക്കളുമുണ്ട്.
ചിന്തമംഗലം എന്ന പാര്‍ട്ടി ഗ്രാമത്തിലെ ദിനേശന്‍ മാഷിന്റെ ജീവിതത്തിലൂടെയാണ് ചിത്രത്തിന്റെ കഥ പുരോഗമിക്കുന്നത്. ശ്രീനാഥ് ഭാസിയാണ് ദിനേശന്‍ മാസ്റ്ററുടെ കഥാപാത്രത്തെ അവതരിപ്പിച്ചത്. അന്ധവിശ്വാസങ്ങള്‍ക്കും അനാചാരങ്ങള്‍ക്കുമെതിരെയുള്ള പൊളിറ്റിക്കല്‍ സറ്റയറാണ് ചിത്രം.
സ്‌പോയിലര്‍ അലര്‍ട്ട്…
കമ്യൂണിസ്റ്റ് ചിന്താഗതിയുള്ള സഖാവ് ദിനേശന്‍ മാസ്റ്റര്‍ ഒരുവേള അന്ധവിശ്വാസങ്ങളില്‍ വിശ്വസിക്കുന്നതും ജീവിതപുരോഗതിക്ക് വേണ്ടി അനാചാരങ്ങളുടെ പിന്നാലെ പോകുന്നതും പിന്നീട് അതില്‍ കാര്യമില്ലെന്ന് മനസിലാക്കി തിരിച്ച് വരുന്നതുമാണ് സിനിമയുടെ കഥ.
വലിയ ആശയമാണ് സിനിമ സംവദിക്കാന്‍ ശ്രമിക്കുന്നത്. എന്നാല്‍ ചിത്രത്തിലെ പല ഡയലോഗുകളും തമാശക്ക് വേണ്ടി തിരുകി കയറ്റിയിരിക്കുന്ന സീനുകളും ഈ പ്രധാന ആശയം പ്രേക്ഷകരിലേക്ക് എത്തുന്നതില്‍ തടസമാവുകയാണ്.
പുരോഗമന ചിന്താഗതി ഡയലോഗില്‍ കൊണ്ടുവരുമ്പോള്‍ തിയേറ്ററില്‍ കയ്യടി കിട്ടുമെന്ന് പ്രതീക്ഷിച്ചാണ് പല ഡയലോഗുകളും ഉള്‍ക്കൊള്ളിച്ചിരിക്കുന്നതെന്നാണ് തോന്നുക. സിനിമയിലെ വിലകുറഞ്ഞ തമാശകളും അതിഥി തൊഴിലാളികളെ മോശക്കാരാക്കി ചിത്രീകരിച്ചിരിക്കുന്ന രീതിയും അരോചകമായിരുന്നു. പണ്ടേക്ക് പണ്ടേ സമൂഹം മാറിചിന്തിച്ച ബോഡി ഷേമിങ്ങ് വരെ ഈ സിനിമക്ക് തമാശയാണ്.
