'മുഖ്യമന്ത്രി ജനങ്ങളെ കൊഞ്ഞനം കുത്തുന്നു'; നവകേരള സദസിനെ വിമര്‍ശിച്ച് കെ സുധാകരന്‍; പ്രതിപക്ഷത്തിന്റെ ആരോപണം ഹിമാലയം ബ്ലണ്ടറാണെന്ന് റിയാസ്
ഡൂള്‍ന്യൂസ് ഡെസ്‌ക്
Friday, 17th November 2023, 11:58 am
തിരുവനന്തപുരം: നവകേരള സദസിനെതിരെ വിമര്‍ശനവും പരിഹാസവുമായി കെ.പി.സി.സി പ്രസിഡന്റ് കെ. സുധാകരന്‍. നവകേരള സദസിലൂടെ മുഖ്യമന്ത്രി ജനങ്ങളെ കൊഞ്ഞനം കുത്തുകയാണെന്നും അവരെ വിഢികളാക്കുകയാണെന്നും അദ്ദേഹം പറഞ്ഞു.
ഒരു കോടി രൂപ വരുന്ന ബെന്‍സ് കാര്‍ ഉപയോഗിച്ച് മുഖ്യമന്ത്രി നടത്തുന്ന യാത്ര കേരളത്തിലെ ജനങ്ങള്‍ക്കെതിരെ കൊഞ്ഞനം കാട്ടുകയാണ്. അന്തസും അഭിമാനവുമുണ്ടെങ്കില്‍ കേരളത്തിലെ ജനതയുടെ സാമ്പത്തിക പ്രതിസന്ധി പരിഹരിക്കാന്‍ മനസുണ്ടെങ്കില്‍ ധൂര്‍ത്ത് അവസാനിപ്പിക്കാന്‍ ഇതോടുകൂടിയെങ്കിലും മുഖ്യമന്ത്രിക്ക് സാധിക്കണം. ആത്മരക്ഷക്ക് വേണ്ടി മുഖ്യമന്ത്രി കോടികളാണ് ചെലവഴിക്കുന്നത്. അദ്ദേഹം പുനരാലോചിക്കണമെന്നും അല്ലെങ്കില്‍ കൂടെയുള്ള ആരെങ്കിലും അദ്ദേഹത്തെ ഉപദേശിക്കണമെന്നും സുധാകരന്‍ പറഞ്ഞു.
