'മഹാസഖ്യത്തിന്റെ മുഖ്യമന്ത്രി സ്ഥാനാര്‍ത്ഥി കനയ്യകുമാറാവുമോ?'; കുശ്‌വാഹയുടെ മറുപടി ഇങ്ങനെ
ഡൂള്‍ന്യൂസ് ഡെസ്‌ക്
Saturday, 25th July 2020, 1:32 pm
പാറ്റ്‌ന: ബീഹാര്‍ നിയമസഭ തെരഞ്ഞെടുപ്പില്‍ തേജസ്വി യാദവിനെ മുഖ്യമന്ത്രി സ്ഥാനാര്‍ത്ഥിയാക്കുന്നതില്‍ തങ്ങള്‍ക്കാര്‍ക്കും എതിര്‍പ്പില്ലെന്ന് ആര്‍.എല്‍.എസ്.പി നേതാവ് ഉപേന്ദ്ര കുശ്‌വാഹ. എന്നാല്‍ ആ തീരുമാനം മഹാസഖ്യത്തിലെ എല്ലാ പാര്‍ട്ടികളും ചേര്‍ന്നെടുക്കേണ്ടതാണെന്നും അദ്ദേഹം പറഞ്ഞു. ഔട്ട്‌ലുക്കിന് നല്‍കിയ അഭിമുഖത്തിലാണ് പ്രതികരണം.
മഹാസഖ്യത്തിലെ പാര്‍ട്ടികളുടെ സീറ്റ് വിതരണ ചര്‍ച്ചകള്‍ ആരംഭിച്ചിട്ടില്ല. ആര്‍.ജെ.ഡി 150 സീറ്റില്‍ മത്സരിക്കുമെന്ന് പ്രഖ്യാപിച്ചത് വ്യത്യസ്തമായ കാര്യമാണ്. വിഷയം മഹാസഖ്യത്തിലേക്ക് വരുമ്പോള്‍ തീരുമാനം ഓരോരുത്തരുടെയും താല്‍പര്യങ്ങള്‍ സംരക്ഷിച്ചുകൊണ്ടാവണമെന്നും കുശ്‌വാഹ പറഞ്ഞു.
