ലോകത്തിലെ ഏറ്റവും മികച്ച ഫുട്‌ബോള്‍ താരങ്ങളില്‍ ഒരാളാണ് ഫ്രഞ്ച് സൂപ്പര്‍ സ്‌ട്രൈക്കര്‍ കിലിയന്‍ എംബാപ്പെ. താരം നിലവില്‍ ബൂട്ടുകെട്ടുന്ന ക്ലബ്ബായ പി.എസ്.ജിക്ക് അത് വ്യക്തമായി അറിയാവുന്നതുകൊണ്ട് തന്നെ എന്ത് വില കൊടുത്തും എംബാപ്പെയെ തങ്ങള്‍ക്കൊപ്പം നിര്‍ത്താനാണ് പി.എസ്.ജി ശ്രമിക്കുന്നത്.
എംബാപ്പെ പി.എസ്.ജിയില്‍ നിരന്തരം പ്രശ്‌നങ്ങള്‍ സൃഷ്ടിക്കുന്നയാളാണെന്നും ബ്രസീലിയന്‍ സൂപ്പര്‍ താരം നെയ്മര്‍ ക്ലബ്ബില്‍ തുടരുന്നതിനോട് എംബാപ്പെക്ക് വിയോജിപ്പുണ്ടെന്നും നേരത്തെ അഭ്യൂഹങ്ങള്‍ ഉണ്ടായിരുന്നു.
നെയ്മറെ ക്ലബ്ബില്‍ നിന്ന് പുറത്താക്കാന്‍ എംബാപ്പെ പി.എസ്.ജിയോട് ആവശ്യപ്പെട്ടതായും അഭ്യൂഹങ്ങള്‍ ഉണ്ട്.
ഇപ്പോള്‍ താരം പുതിയൊരു ഡിമാന്‍ഡുമായി എത്തിയിട്ടുണ്ടെന്നും നെയ്മറെ ഒഴിവാക്കി പകരം തനിക്ക് ഇഷ്ടമുള്ള താരത്തെ പി.എസ്.ജി സൈന്‍ ചെയ്യിക്കണമെന്ന് എംബാപ്പെ ആവശ്യപ്പെട്ടെന്നുമാണ് റിപ്പോര്‍ട്ട്.
മാഞ്ചസ്റ്റര്‍ സിറ്റിയുടെ പോര്‍ച്ചുഗല്‍ താരം ബെര്‍ണാര്‍ഡ് സില്‍വയെ ക്ലബ്ബിലെത്തിക്കണമെന്നാണ് എംബാപ്പെയുടെ ആവശ്യം. സപാനിഷ് മാധ്യമമായ ലാ റെയ്‌സണ്‍ ആണ് ഇക്കാര്യം റിപ്പോര്‍ട്ട് ചെയ്തത്.
സില്‍വയുടെ സിറ്റിയുമായുള്ള കരാര്‍ അവസാനിക്കാനിരിക്കെ താരം എഫ്.സി ബാഴ്‌സലോണയുമായി സൈന്‍ ചെയ്യാന്‍ ശ്രമിച്ചിരുന്നെന്നും എന്നാല്‍ ബാഴ്‌സക്ക് സില്‍വയെ വാങ്ങാനുള്ള സാമ്പത്തിക സ്ഥിതി ഇല്ലാത്തതിനാല്‍ അത് നടന്നില്ലെന്നും റിപ്പോര്‍ട്ടുണ്ട്.
തുടര്‍ന്ന് സില്‍വയെ പി.എസ്.ജിയില്‍ എത്തിക്കുന്നതിനെ പറ്റി എംബാപ്പെ ആവശ്യപ്പെടുകയായിരുന്നെന്നാണ് ലെ റെയ്‌സണ്‍ റിപ്പോര്‍ട്ട് ചെയ്യുന്നത്.
അതേസമയം നെയ്മര്‍ അടുത്ത സീസണില്‍ പി.എസ്.ജി വിടാന്‍ ഒരുങ്ങുകയാണെന്നും അഭ്യൂഹങ്ങളുണ്ട്.
