ഓവര്‍സീസ് മത്സരങ്ങള്‍ കളിക്കാന്‍ പേടിയാണ് എന്ന് സമ്മതിച്ചാല്‍ പോരെ രോഹിത്തേ; രോഹിത് ശര്‍മയുടെ പരിക്കിനെ പരിഹസിച്ച് ക്രിക്കറ്റ് ആരാധകര്‍
സ്പോര്‍ട്സ് ഡെസ്‌ക്
Tuesday, 14th December 2021, 10:01 am
ഇന്ത്യന്‍ റെഡ്‌ബോള്‍ ക്രിക്കറ്റ് ടീം വൈസ് ക്യാപ്റ്റന്‍ രോഹിത് ശര്‍മയുടെ പരിക്കിനെ കളിയാക്കി ക്രിക്കറ്റ് ആരാധകര്‍. ദക്ഷിണാഫ്രിക്കയുമായി നടക്കാനിരിക്കുന്ന പരമ്പരയുടെ പ്രാക്ടീസ് സെഷനില്‍ വെച്ചാണ് താരത്തിന് പരിക്കേറ്റത്.
നെറ്റ്‌സില്‍ പ്രാക്ടീസ് ചെയ്യവെയാണ് രോഹിത്തിന് പരിക്കേറ്റത്. സൈഡ് ആം ഉപയോഗിച്ചുള്ള പ്രാക്ടീസിനിടെയാണ് താരത്തിന്റെ കൈവിരലിന് പരിക്കേറ്റിരിക്കുന്നത്. ത്രോഡൗണ്‍ സ്പെഷ്യലിസ്റ്റ് രാഘവേന്ദ്രയുടെ പന്ത് രോഹിത്തിന്റെ കയ്യില്‍ കൊള്ളുകയും വേദനകൊണ്ട് പുളഞ്ഞ രോഹിത് താഴെ വീഴുകയുമായിരുന്നു.
മൂന്നാഴ്ചയോളം രോഹിത്തിന് വിശ്രമം വേണ്ടിവരുമെന്നും ദക്ഷിണാഫ്രിക്കയുമായി നടക്കുന്ന പരമ്പര നഷ്ടപ്പെടുമെന്നുമാണ് റിപ്പോര്‍ട്ടുകള്‍. താരത്തിന് പകരം സൗരാഷ്ട്ര ബാറ്റര്‍ പ്രിയങ്ക് പാഞ്ചലിനെ ടീമില്‍ ഉള്‍പ്പെടുത്തിയതായും സൂചനയുണ്ട്.
