തിരുവനന്തപുരം: തൃശ്ശൂരില്‍ എല്‍.ഡി.എഫ് സീറ്റ് നിലനിര്‍ത്തുമെന്ന് മനോരമന്യൂസ് -വി.എം.ആര്‍ അഭിപ്രായസര്‍വേ. ശക്തമായ ത്രികോണ മത്സരം നടക്കുന്ന മണ്ഡലമാണ് തൃശ്ശൂര്‍.
നിലവില്‍ കൃഷി മന്ത്രി വി.എസ് സുനില്‍കുമാര്‍ പ്രതിനീധികരിക്കുന്ന മണ്ഡലം പി. ബാലചന്ദ്രനിലൂടെ ഇടത് നിലനിര്‍ത്തുമെന്നാണ് സര്‍വേ പറയുന്നത്. യു.ഡി.എഫിന്റെ പത്മജ വേണുഗോപാല്‍ രണ്ടാമതും എന്‍.ഡി.എയുടെ സുരേഷ് ഗോപി മൂന്നാം സ്ഥാനത്തും എന്നുമാണ് സര്‍വേഫലം.
മലപ്പുറം, പാലക്കാട്, തൃശൂര്‍, ഇടുക്കി ജില്ലകളിലെ ഫലമാണ് രണ്ടാം ദിവസം പുറത്തുവിടുന്നത്. 27000 പേരില്‍ നിന്നാണ് വി.എം.ആര്‍ വിവിധ മണ്ഡലങ്ങളിലായി അഭിപ്രായം ആരാഞ്ഞത്.
സംസ്ഥാനത്തെ 140 നിയമസഭാ മണ്ഡലങ്ങളിലെയും ജയസാധ്യതയാണ് പരിശോധിക്കുന്നത്. ബുധനാഴ്ച വരെ നാലു ദിവസങ്ങളിലായാണ് സര്‍വേ ഫലം പുറത്തുവിടുക.
