ന്യൂദല്‍ഹി: ന്യൂസ് നാഷന്‍ ടെലിവിഷന് നല്‍കിയ അഭിമുഖത്തില്‍ പ്രധാനമന്ത്രി മോദി പറഞ്ഞ ഓരോ നുണകളും അബദ്ധങ്ങളും വാര്‍ത്തയാവുന്നതിനിടെ വിമര്‍ശനവുമായി സി.പി.ഐ.എം ജനറല്‍ സെക്രട്ടറി സീതാറാം യെച്ചൂരി.
This is the latest in the long series of delusional assertions, fudged claims and brazen lies uttered by Modi. These would make for a great joke if the matter was not so serious involving the post of PM. https://t.co/s353zPG6fJ
— Sitaram Yechury (@SitaramYechury) May 13, 2019
പരമ്പരയിലെ ഏറ്റവും ഒടുവിലത്തേതാണ് പുറത്തു വന്നതെന്നും അബദ്ധങ്ങളും പൊങ്ങച്ചങ്ങളും നുണകളുമൊക്കെ തമാശയാക്കാമായിരുന്നു പറഞ്ഞത് പ്രധാനമന്ത്രി അല്ലായിരുന്നുവെങ്കിലെന്ന് യെച്ചൂരി ട്വീറ്റ് ചെയ്തു.
1987-88 കാലഘട്ടത്തില്‍ ഡിജിറ്റല്‍ ക്യാമറയും ഇ-മെയിലും ഉപയോഗിച്ചെന്ന് അഭിമുഖത്തില്‍ മോദി അവകാശപ്പെട്ടതാണ് ഏറ്റവും പുതിയതായി ചര്‍ച്ച ചെയ്യപ്പെട്ടിരുന്നത്. എന്നാല്‍ 1995 മുതലാണ് ഇന്ത്യയില്‍ ഇ മെയില്‍ ഉപയോഗത്തില്‍ വന്നതെന്ന് അറിയാതെയാണ് മോദിയുടെ പ്രസ്താവന. മാത്രമല്ല ആദ്യ ഡിജിറ്റല്‍ ക്യാമറ വില്പനയ്ക്ക് എത്തിയത് 1990-ലാണെന്നും വിമര്‍ശകര്‍ ചൂണ്ടിക്കാണിച്ചിരുന്നു.
ന്യൂസ് നാഷന്‍ ചാനലിന് പ്രധാനമന്ത്രി നരേന്ദ്രമോദി നല്‍കിയ അഭിമുഖം നേരത്തെ എഴുതി തയ്യാറാക്കിയതാണെന്ന ആരോപണം ശക്തമാണ്. ഇന്റര്‍വ്യൂവിലെ ചില ഭാഗങ്ങള്‍ ഉയര്‍ത്തിക്കാട്ടിയാണ് മാധ്യമപ്രവര്‍ത്തകരുള്‍പ്പെടെ ഇത്തരമൊരു ആരോപണം ഉന്നയിക്കുന്നത്.
