ഇതുതന്നെയല്ലേ നാസികളും ചെയ്തത്; രാമക്ഷേത്രത്തിന് പണം നല്‍കാത്ത വീടുകള്‍ മാര്‍ക്ക് ചെയ്യുന്ന ആര്‍.എസ്.എസ് നടപടിക്കെതിരെ കുമാരസാമി
ഡൂള്‍ന്യൂസ് ഡെസ്‌ക്
Tuesday, 16th February 2021, 1:01 pm
ബെംഗളുരു: രാമക്ഷേത്രത്തിന് സംഭാവന ചെയ്തവരുടെയും സംഭാവന ചെയ്യാത്തവരുടെയും വീടുകള്‍ രേഖപ്പെടുത്തിവെക്കുന്ന ആര്‍.എസ്.എസിന്റെ നടപടിയെ വിമര്‍ശിച്ച് കര്‍ണാടക മുന്‍ മുഖ്യമന്ത്രി എച്ച്.ഡി കുമാരസാമി.
ഇതുതന്നെയല്ലേ ജര്‍മ്മനിയില്‍ നാസികളും ചെയ്തത് എന്നാണ് കുമാര സ്വാമി ചോദിച്ചത്.
ജര്‍മ്മനിയില്‍ നാസി പാര്‍ട്ടി രൂപികരിക്കുന്ന സമയത്താണ് ഇന്ത്യയില്‍ ഏകദേശം ആര്‍.എസ്.എസ് പിറവിയെടുക്കുന്നതെന്നും കുമാരസാമി പറഞ്ഞു.
” രാമക്ഷേത്രത്തിന് സംഭാവന പിരിക്കുന്നവര്‍ പണം നല്‍കിയവരുടെ വീടുകളും നല്‍കാത്തവരുട വീടുകളും പ്രത്യേകം രേഖപ്പെടുത്തി വെക്കുന്നുണ്ടെന്നാണ് മനസിലാകുന്നത്. ഇത് ഹിറ്റ്‌ലറിന്റെ ഭരണകാലത്ത് ജര്‍മ്മനിയില്‍ നാസികള്‍ ചെയ്തതിന് തുല്യമാണ്,” അദ്ദേഹം കൂട്ടിച്ചേര്‍ത്തു.
