പി. മോഹനനെ ലക്ഷ്യംവെച്ച് ബോംബറിഞ്ഞ കേസില്‍ ഒളിവിലായരുന്ന ആര്‍.എസ്.എസുകാരന്‍ പിടിയില്‍
ഡൂള്‍ന്യൂസ് ഡെസ്‌ക്
Friday, 23rd September 2022, 2:38 pm
കോഴിക്കോട്: സി.പി.ഐ.എം കോഴിക്കോട് ജില്ലാ സെക്രട്ടറി പി. മോഹനനെ ലക്ഷ്യംവെച്ച് ബോംബറിഞ്ഞ കേസില്‍ ഒളിവിലായിരുന്ന പ്രതി പിടിയില്‍. ആര്‍.എസ്.എസ് പ്രവര്‍ത്തകന്‍ വടകര പുറമേരി സ്വദേശി നജീഷാണ് പിടിയിലായത്. കേസില്‍ മൂന്നാം പ്രതിയാണ് നജീഷ്. ദുബായില്‍ ഒളിവിലായിരുന്ന ഇയാള്‍ക്കായി ബ്ലു കോര്‍ണര്‍ നോട്ടീസ് പുറപ്പെടുവിച്ചിരുന്നു.
ദുബായ് പൊലീസ് അറസ്റ്റ് ചെയ്ത പ്രതിയെ കേരള പൊലീസിന് കൈമാറുകയായിരുന്നു. വെള്ളിയാഴ്ച പുലര്‍ച്ചെ കരിപ്പൂര്‍ വിമാനത്താവളത്തില്‍ എത്തിയ നജീഷിനെ ക്രൈംബ്രാഞ്ച് ഡി.വൈ.എസ്.പി ടി.പി. സജീവന്റെ നേതൃത്വത്തില്‍ പൊലീസ് കസ്റ്റഡിയില്‍ വാങ്ങി. പ്രതിയെ ജില്ലാകമ്മിറ്റി ഓഫീസ് ജീവനക്കാര്‍ തിരിച്ചറിഞ്ഞു.
കേസില്‍ രണ്ട് ആര്‍.എസ്.എസ് പ്രവര്‍ത്തകര്‍ നേരത്തെ അറസ്റ്റിലായിരുന്നു. കോഴിക്കോട് സ്വദേശി രൂപേഷ്, നാദാപുരം സ്വദേശി ഷിജി എന്നിവരാണ് അറസ്റ്റിലായിരുന്നത്.
