‘പോത്തന്‍കോട് ഗുണ്ടാ ആക്രമണം നിര്‍ഭാഗ്യകരമാണ്. ഇത്തരം സംഭവങ്ങള്‍ ആവര്‍ത്തിക്കാതിരിക്കാന്‍ പൊലീസ് നടപടിയെടുക്കണം,’ മന്ത്രി പറഞ്ഞു.
പൊലീസ് ജാഗ്രതയോടെ ഇത്തരം വിഷയങ്ങള്‍ കൈകാര്യം ചെയ്യണമെന്ന് നിര്‍ദേശം നല്‍കിയിരുന്നു. പോത്തന്‍കോട് വീണ്ടും ഗുണ്ടാ ആക്രമണം ഉണ്ടായതിനെ വളരെ ഗുരുതരമായിട്ടാണ് കാണുന്നത്. ജാഗ്രതയോടെ നീങ്ങിയില്ലെങ്കില്‍ പിന്നീട് എന്തെന്ന് അപ്പോള്‍ പറയാമെന്നും മന്ത്രി മുന്നറിയിപ്പ് നല്‍കി.
‘പൊലീസിന് മേലുള്ള രാഷ്ട്രീയ മേല്‍നോട്ടത്തിന് കുറവില്ല. പല സംഭവങ്ങളും ഉണ്ടായി മിനുട്ടുകള്‍ക്കകം പ്രതികള്‍ അറസ്റ്റിലാകുന്നുണ്ട്,’ മന്ത്രി പറഞ്ഞു.
പൊലീസ് ഗൗരവമായി നീങ്ങാന്‍ പൊളിറ്റിക്കല്‍ ലീഡര്‍ഷിപ്പ് ഇടപെടുന്നതിന്റെ ലക്ഷണമാണ് അതെന്നും മന്ത്രി പറഞ്ഞു. പോത്തന്‍കോട് ഗുണ്ടാ ആക്രമണത്തിന് ഇരയായവരെ നേരില്‍ കാണുമെന്നും മന്ത്രി വ്യക്തമാക്കി.
തിരുവനന്തപുരം പോത്തന്‍കോട് വെഞ്ഞാറമൂട് സ്വദേശിക്കും മകള്‍ക്കും നേരെയാണ് കഴിഞ്ഞദിവസം ഗുണ്ടാ ആക്രമണം ഉണ്ടായത്. ഇവര്‍ സഞ്ചരിച്ച കാര്‍ തടഞ്ഞുനിര്‍ത്തി അക്രമം അഴിച്ചുവിടുകയായിരുന്നു.
നിരവധി കേസുകളിലെ പ്രതിയും, പള്ളിപ്പുറത്ത് ജ്വല്ലറി ഉടമയെ മുകളുപൊടി എറിഞ്ഞ് വെട്ടിപ്പരിക്കേല്‍പ്പിച്ച് നൂറുപവന്റെ സ്വര്‍ണം കവര്‍ന്ന കേസിലെ പ്രതിയായ ഫൈസലിന്റെ നേതൃത്വത്തിലുള്ള ഗുണ്ടാ സംഘമാണ് ആക്രമണം നടത്തിയത്.
