അമ്മയുടെ ഏക കോമഡി പടമാണ് ഞാന്‍ ആദ്യം കണ്ടത്, ബാക്കിയെല്ലാം കണ്ടത് വൈകിയാണ്; ജലജയുടെ മകള്‍ ദേവി പറയുന്നു
എന്റര്‍ടെയിന്‍മെന്റ് ഡെസ്‌ക്
Sunday, 25th July 2021, 4:55 pm
മഹേഷ് നാരായണന്‍ സംവിധാനം ചെയ്ത മാലികില്‍ അമ്മയായ ജലജക്കൊപ്പം അഭിനയിക്കാന്‍ കഴിഞ്ഞതിന്റെ സന്തോഷത്തിലാണ് ദേവി. ചിത്രത്തില്‍ ജലജയുടെ കഥാപാത്രത്തിന്റെ ചെറുപ്പകാലം ചെയ്തത് മകള്‍ ദേവിയായിരുന്നു.
അമ്മയുടെ മറ്റ് സിനിമകള്‍ കാണാറുണ്ടോ എന്ന ചോദ്യത്തിന് മറുപടി പറയുകയാണ് ഇന്ത്യഗ്ലിറ്റ്‌സിന് നല്‍കിയ അഭിമുഖത്തില്‍ ദേവി.
‘വളരെ വൈകിയാണ് അമ്മയുടെ സിനിമകള്‍ കണ്ടുതുടങ്ങിയത്. കാരണം ചെറിയ കുട്ടിയായിരിക്കുമ്പോള്‍ എനിക്ക് അറിയില്ലായിരുന്നു അമ്മ നടിയാണെന്ന്. പിന്നീടാണ് മനസ്സിലായത്. നിങ്ങള്‍ വിചാരിക്കുന്ന അമ്മയുടെ പടങ്ങളൊന്നുമല്ല ഞാന്‍ ആദ്യം കണ്ടത്. അമ്മയുടെ ഏക കോമഡി പടമായ മണ്ടന്‍മാര്‍ ലണ്ടനില്‍ ആണ് ആദ്യം കണ്ട പടം,’ ദേവി പറയുന്നു.
അമ്മയുടെ സിനിമകളില്‍ പലതും പഠിക്കാനുള്ളവയാണെന്നും ദേവി പറഞ്ഞു.
