ഗര്‍ഭനിരോധാന ഉപകരണങ്ങള്‍ വിപണിയിലിറക്കുന്നില്ല; ജനനനിരക്ക് കുത്തനെ കൂട്ടാനൊരുങ്ങി ഇറാന്‍
ഡൂള്‍ന്യൂസ് ഡെസ്‌ക്
Sunday, 5th December 2021, 4:47 pm
ടെഹ്‌റാന്‍: രാജ്യത്തെ ജനനനിരക്ക് വര്‍ധിപ്പിക്കാന്‍ വേണ്ടി വ്യക്തികളുടെ അവകാശങ്ങളെ ഹനിക്കുന്ന തരത്തിലുള്ള പുതിയ നീക്കവുമായി ഇറാന്‍.
വിവിധ ഗര്‍ഭനിരോധാന ഉപകരണങ്ങളും മരുന്നുകളും വിപണിയിലിറക്കുന്നത് കുത്തനെ കുറച്ചും അബോര്‍ഷനടക്കമുള്ള മെഡിക്കല്‍ പ്രക്രിയകള്‍ തടഞ്ഞുമുള്ള നടപടികളാണ് ജനസംഖ്യ വര്‍ധിപ്പിക്കുന്നതിന് വേണ്ടി സര്‍ക്കാര്‍ സ്വീകരിച്ചിരിക്കുന്നത്.
വിദേശ നിര്‍മിതമായ ഗര്‍ഭനിരോധന മാര്‍ഗങ്ങള്‍ ഇറാനിലേയ്ക്ക് ഇറക്കുമതി ചെയ്യുന്നതിലാണ് കുത്തനെ ഇടിവുണ്ടായിരിക്കുന്നത്. ലഭ്യമായവയ്‌ക്കെല്ലാം വില വര്‍ധിപ്പിക്കുകയും ചെയ്തിട്ടുണ്ട്.
അതേസമയം ഇറാനില്‍ തന്നെ നിര്‍മിക്കപ്പെട്ട ഗര്‍ഭനിരോധന മരുന്നുകളും ഉപകരണങ്ങളും ലഭ്യമാണെങ്കിലും അവയുടെ സുരക്ഷയും നിലവാരവും വിദേശവസ്തുക്കളുമായി താരതമ്യം ചെയ്യുമ്പോള്‍ വളരെ കുറവാണെന്നാണ് ആളുകള്‍ പരാതിപ്പെടുന്നത്.
