പൊലീസ് വാദം പൊളിയുന്നു; സനൂപിനെയും എഡിറ്ററെയും പൊലീസ് ചവിട്ടുന്ന വീഡിയോ പുറത്ത്
ഡൂള്‍ന്യൂസ് ഡെസ്‌ക്
Tuesday, 16th May 2023, 5:46 pm
കൊച്ചി: യുവനടനും വിഷ്വല്‍ എഡിറ്ററും പൊലീസിനെ അക്രമിച്ചെന്ന കേസില്‍ പൊലീസ് വാദം പൊളിയുന്നു. പിടിയിലായ യുവാക്കളെ പൊലീസ് നിലത്തിട്ട് ചവിട്ടുന്ന വീഡിയോ പുറത്തുവന്നു. ഇന്നലെ രാത്രി സംഭവം കണ്ടുനിന്ന ആളുകള്‍ പകര്‍ത്തിയ വീഡിയോയാണ് പുറത്തുവന്നിരിക്കുന്നത്.
പിടിയിലായവരെ നോര്‍ത്ത് സി.ഐ. മുഖത്തടിച്ചെന്നും പരാതിയുണ്ട്. നടന്‍ സനൂപ് അടക്കമുള്ളവരെ പിടിയിലായ ശേഷം വാഹനത്തില്‍ ബലം പ്രയോഗിച്ച് കയറ്റുന്നതും പുറത്തുവന്ന വീഡിയോയിലുണ്ട്. എന്നാല്‍ യുവാക്കള്‍ ജീപ്പില്‍ കയറാന്‍ വിസമ്മതിച്ചതിനെ തുടര്‍ന്നുള്ള പിടിവലിയാണ് ദൃശ്യങ്ങളിലുള്ളതെന്നാണ് പൊലീസ് വാദം.
ഇന്നലെ രാത്രി ദേശാഭിമാനി ജംങ്ഷനിലാണ് സംഭവമുണ്ടായത്. തൃശൂര്‍ സ്വദേശി സനൂപ് കുമാര്‍, പാലക്കാട് സ്വദേശി രാഹുല്‍ രാജ് എന്നിവരാണ് അറസ്റ്റിലായത്.
