ടി.ആര്‍.പി അഴിമതി: അര്‍ണബിനെ അറസ്റ്റ് ചെയ്യണമെങ്കില്‍ മൂന്ന് ദിവസം മുന്‍പ് നോട്ടീസ് നല്‍കണമെന്ന് കോടതി
ഡൂള്‍ന്യൂസ് ഡെസ്‌ക്
Wednesday, 24th March 2021, 6:59 pm
മുംബൈ: ടി.ആര്‍.പി അഴിമതിക്കേസില്‍ റിപ്പബ്ലിക് ടിവി എഡിറ്റര്‍ ഇന്‍ ചീഫ് അര്‍ണബ് ഗോസ്വാമിയെ അറസ്റ്റുചെയ്യണമെങ്കില്‍ മൂന്ന് ദിവസത്തെ മുന്‍കൂര്‍ നോട്ടീസ് നല്‍കണമെന്ന് ബോംബെ ഹൈക്കോടതി മുംബൈ പൊലീസിന് നിര്‍ദേശം നല്‍കി.
മൂന്ന് മാസമായി പൊലീസ് കേസ് അന്വേഷിച്ചുവരികയാണെന്നും അര്‍ണബ് ഗോസ്വാമിയെ കേസിലെ പ്രതിയായി ഇതുവരെ ഉള്‍പ്പെടുത്തിയിട്ടില്ലെന്നും ബെഞ്ച് വിലയിരുത്തി.
കുറ്റപത്രത്തില്‍ അര്‍ണബ് ഗോസ്വാമിയെ സസ്‌പെക്റ്റ് ആയാണ് ചേര്‍ത്തിട്ടുള്ളതെന്നും അതിനാല്‍, ആസന്നമായ അറസ്റ്റിന്റെ വാള്‍ അര്‍ണബിന്റെ തലയില്‍ തൂങ്ങിക്കിടക്കുന്നുണ്ട് എന്നും കോടതി പറഞ്ഞു.
റിപ്പബ്ലിക് ടിവി ചാനലിനും അര്‍ണബ് ഗോസ്വാമിക്കും എ.ആര്‍.ജി ഔട്ട്ലിയര്‍ മീഡിയയിലെ മറ്റ് ജീവനക്കാര്‍ക്കുമെതിരെ പൊലീസ് നടത്തിയ അന്വേഷണം അപകീര്‍ത്തികരമാണെന്നും അര്‍ണബിന്റെ അഭിഭാഷകന്‍ പറഞ്ഞു.
