ചൗഹാന്റെ വ്യാജ സന്ദേശം പ്രചരിപ്പിച്ചെന്ന് കേസ്, ദിഗ് വിജയ സിങിന് കുരുക്ക്; നടപടി ബി.ജെ.പി പ്രവര്‍ത്തകരുടെ പരാതിയില്‍
ഡൂള്‍ന്യൂസ് ഡെസ്‌ക്
Monday, 15th June 2020, 10:38 am
ഭോപാല്‍: മുതിര്‍ന്ന കോണ്‍ഗ്രസ് നേതാവ് ദിഗ് വിജയ സിങിനെതിരെ കേസ് രജിസ്റ്റര്‍ ചെയ്ത് ഭോപാല്‍ പൊലീസ്. മുഖ്യമന്ത്രിയും ബി.ജെ.പി നേതാവുമായ ശിവരാജ് സിങ് ചൗഹാന്‍ ഉള്‍പ്പെടുന്ന വ്യാജ വീഡിയോ സമൂഹമാധ്യമങ്ങളില്‍ പങ്കുവെച്ചതിലാണ് കേസ്. ഭോപാല്‍ പൊലീസ് ക്രൈം ബ്രാഞ്ചാണ് എഫ്.ഐ.ആര്‍ രജിസ്റ്റര്‍ ചെയ്തിരിക്കുന്നത്.
ബി.ജെ.പി പ്രവര്‍ത്തകരാണ് ദിഗ് വിജയ സിങിനെതിരെ പരാതി നല്‍കിയത്. ഐ.പി.സി 465, 500 എന്നിവ ചുമത്തിയാണ് കേസ്.
തന്റേതെന്ന രീതിയില്‍ പ്രചരിക്കുന്നത് വ്യാജ വീഡിയോ ആണെന്ന് ശിവരാജ് സിങ് ചൗഹാന്‍ നേരത്തെ അറിയിച്ചിരുന്നു. വീഡിയോ പങ്കുവെക്കുന്നവര്‍ക്കെതിരെ നിയമനടപടി സ്വീകരിക്കുമെന്നും അദ്ദേഹം അറിയിച്ചിരുന്നു.
ഈ മുന്നറിയിപ്പ് നിലനില്‍ക്കെയായിരുന്നു ദിഗ് വിജയ സിങ് വീഡിയോ ട്വിറ്ററില്‍ പങ്കുവെച്ചത്. ഇതേച്ചൊല്ലി വിവാദം ആരംഭിച്ചതോടെ അദ്ദേഹം വീഡിയോ പിന്‍വലിച്ചിരുന്നു.
