വൈദ്യുതി നിലച്ചാല്‍ മിനിറ്റുകള്‍ക്കുള്ളില്‍ നവജാത ശിശുക്കളെ നഷ്ടപ്പെടും: ലോകത്തോട് സഹായമഭ്യര്‍ഥിച്ച് ഗസയിലെ ഡോക്ടര്‍മാര്‍
ഡൂള്‍ന്യൂസ് ഡെസ്‌ക്
Monday, 23rd October 2023, 9:58 pm
ഗസ: ഇസ്രഈല്‍ ആക്രമണത്തെ തുടര്‍ന്ന് ഗസയിലെ ആശുപത്രികളില്‍ കുഞ്ഞുങ്ങള്‍ ജീവന് വേണ്ടി മല്ലിടുന്നു. ആശുപത്രി ഇന്‍കുബേറ്ററുകളില്‍ 130 നവജാത ശിശുക്കള്‍ ഉണ്ടെന്നും അവരുടെ പരിചരണത്തിനായുള്ള അടിസ്ഥാന സൗകര്യങ്ങളില്‍ കുറവുണ്ടെന്നും തീവ്രപരിചരണ വിഭാഗത്തിലെ ഡോക്ടര്‍മാര്‍ അറിയിച്ചു.
ആശുപത്രിയിലേക്ക് പ്രാഥമിക മരുന്നുകളും മറ്റും അയക്കണമെന്നും അല്ലെങ്കില്‍ വലിയ ദുരന്തം നേരിടേണ്ടി വരുമെന്നും അല്‍-ഷിഫ ആശുപതിയിലെ ഡോക്ടര്‍ നാസര്‍ ബുള്‍ബുള്‍ പറഞ്ഞു. വൈദ്യുതി നിലച്ചാല്‍ അഞ്ച് മിനിറ്റിനുള്ളില്‍ 55 കുഞ്ഞുങ്ങളുടെ ജീവന് ഭീഷണിയില്‍ ആവുമെന്നും ആശുപത്രി അധികൃതര്‍ പറഞ്ഞു.
ഗസയിലെ തന്നെ ഏറ്റവും വലിയ ആശുപത്രിയായ ഷിഫയില്‍ ഇന്ധനം തീര്‍ന്നതായും ലോകം മുഴുവന്‍ തങ്ങളെ സഹായിക്കണമെന്നും ഗസ ആരോഗ്യ മന്ത്രാലയ വക്താവ് അഷ്റഫ് അല്‍ ഖിദ്ര ആവശ്യപ്പെട്ടു.
