ന്യൂദല്‍ഹി: ദല്‍ഹി ക്രിക്കറ്റ് അസോസിയേഷന്‍ (ഡി.ഡി.സി.എ) യോഗത്തിനിടെ ഭാരവാഹികള്‍ തമ്മിലടിക്കുന്ന വീഡിയോ പുറത്ത്. അസോസിയേഷന്റെ വാര്‍ഷിക പൊതുയോഗത്തിലാണു ഭാരവാഹികള്‍ തമ്മിലടിക്കുന്ന ദൃശ്യങ്ങള്‍ എം.പിയും മുന്‍ ഇന്ത്യന്‍ ക്രിക്കറ്റ് താരവുമായ ഗൗതം ഗംഭീര്‍ പുറത്തുവിട്ടത്.
അസോസിയേഷന്‍ പിരിച്ചുവിടണമെന്ന് ബി.സി.സി.ഐ പ്രസിഡന്റ് സൗരവ് ഗാംഗുലിയോടും സെക്രട്ടറി ജയ് ഷായോടും ഗംഭീര്‍ ആവശ്യപ്പെട്ടു. തമ്മിലടിച്ചവരെ എല്ലാം ആജീവനാന്തകാലം വിലക്കണമെന്നും അദ്ദേഹം ട്വിറ്ററില്‍ ആവശ്യപ്പെട്ടു.
യോഗത്തില്‍ ഡി.ഡി.സി.എ അംഗം കൂടിയായ ബി.ജെ.പി എം.എല്‍.എ ഓം പ്രകാശ് ശര്‍മയും പങ്കെടുത്തിരുന്നു. അദ്ദേഹത്തിനു നേര്‍ക്കും കൈയേറ്റം ഉണ്ടായതായി റിപ്പോര്‍ട്ടുകളുണ്ട്. അവിടെയുണ്ടായിരുന്ന ഹാജര്‍ പുസ്തകവും നശിപ്പിക്കപ്പെട്ടു.
വാര്‍ത്തകള്‍ ടെലഗ്രാമില്‍ ലഭിക്കാന്‍ ഇവിടെ ക്ലിക്ക് ചെയ്യൂ
43 സെക്കന്റുള്ള വീഡിയോയാണ് അദ്ദേഹം ട്വീറ്റ് ചെയ്തത്. ആദ്യം ഒരാള്‍ മറ്റൊരാളെ കൈചുരുട്ടി ഇടിക്കുന്നതും പിന്നീട് കൂടുതലാളുകള്‍ അതില്‍ ഇടപെടുന്നതും അന്തരീക്ഷം സംഘര്‍ഭരിതമാകുന്നതുമാണ് വീഡിയോയിലുള്ളത്.
