കൊൽക്കത്ത: പശ്ചിമ ബം​ഗാൾ തീരത്ത് വീശിയടിച്ച ഉംപൂൺ ചുഴലിക്കാറ്റ് കൊവിഡിനേക്കാൾ ഭീകരമെന്ന് പശ്ചിമബം​ഗാൾ മുഖ്യമന്ത്രി മമത ബാനർജി. ഇതിനോടകം പന്ത്രണ്ട് പേരാണ് ഉംപൂണിൽ മരണപ്പെട്ടത്. മരണസംഖ്യ ഇനിയും ഉയർന്നേക്കാമെന്നും മമത കൂട്ടിച്ചേർത്തു. മണിക്കൂറിൽ160 മുതൽ 170 കിലോമീറ്റർ വേ​ഗത്തിലാണ് കാറ്റ് വിശുന്നത്. പശ്ചിമ ബം​ഗാളിൽ നിരവധി കെട്ടിടങ്ങളും വീടുകളും കാറ്റിൽ നിലംപൊത്തി. പലയിടങ്ങളിലെയും വൈദ്യുതി ബന്ധം പൂർണമായും നിലച്ച അവസ്ഥയിലാണ് ഉള്ളത്.

“ഒരു ലക്ഷം കോടിരൂപയുടെ നാശനഷ്ടമെങ്കിലും സംസ്ഥാനത്ത് ഇതിനോടകം ഉണ്ടായിട്ടുണ്ട്. പലയിടങ്ങളിലും എത്തിപ്പെടാൻ പോലും കഴിയാത്ത സാഹചര്യമാണുള്ളത്. ഞങ്ങൾക്ക് എല്ലാം പുനർനിർമ്മിക്കേണ്ടി വരും. ഈ സമയം ഞാൻ കേന്ദ്ര സർക്കാരിനോട് സഹായം ആവശ്യപ്പെടുകയാണ്. ദയവ് ചെയ്ത് ഇപ്പോൾ രാഷ്ട്രീയം കളിക്കരുത്. ഞങ്ങൾക്ക് മാനുഷിക പരി​ഗണന ആവശ്യമാണ്”. മമത പറഞ്ഞു.

ശക്തമായി മഴ തുടരുന്നതിനാൽ പശ്ചിമബം​ഗാളിൽ പല ഇടങ്ങളിലും എത്തിച്ചേരാൻ കഴിയാത്ത സാഹചര്യമാണ് നിലവിലുള്ളത്. വ്യാഴാഴ്ച്ചയോടെ മാത്രമേ നാശനഷ്ടത്തിന്റെ കൃത്യമായ കണക്ക് പറയാൻ സാധിക്കുകയുള്ളൂ എന്നും മമത കൂട്ടിച്ചേർത്തു. ഒഡീഷ തീരത്തും അയൽ രാജ്യമായ ബം​ഗ്ലാാദേശിലും കനത്ത നാശനഷ്ടമാണ് ഉംപൂൺ വിതച്ചത്.

ഡൂള്‍ന്യൂസിനെ ഫേസ്ബുക്ക്, ടെലഗ്രാം, ഹലോ പേജുകളിലൂടെയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക