ത്രിപുരയില്‍ സി.പി.ഐ.എം. പരിപാടിയ്ക്കിടെ ബി.ജെ.പി. ആക്രമണം; സി.പി.ഐ.എം. എം.എല്‍.എയ്ക്ക് പരിക്ക്
ഡൂള്‍ന്യൂസ് ഡെസ്‌ക്
Monday, 28th June 2021, 5:21 pm
അഗര്‍ത്തല: ത്രിപുരയില്‍ സി.പി.ഐ.എം. എം.എല്‍.എയ്ക്ക് ബി.ജെ.പി. പ്രവര്‍ത്തകരുടെ ആക്രമണത്തില്‍ പരിക്ക്. വിലക്കയറ്റത്തിനെതിരായ സി.പി.ഐ.എം. സമരത്തിനിടെയായിരുന്നു ആക്രമണം.
എം.എല്‍.എ. സുധന്‍ ദാസ് അടക്കം പന്ത്രണ്ടോളം പേര്‍ക്ക് പരിക്കേറ്റുവെന്നാണ് റിപ്പോര്‍ട്ട്. രാജ്‌നഗറിലായിരുന്നു സി.പി.ഐ.എം. സമരം സംഘടിപ്പിച്ചിരുന്നത്.
ഇതിന് എതിര്‍വശത്തായി ബി.ജെ.പി. പ്രവര്‍ത്തകരും സംഘടിച്ചു. ഇതോടെ ഇരുവിഭാഗങ്ങളും തമ്മില്‍ മുദ്രാവാക്യം വിളിച്ച് സംഘര്‍ഷമുടലെടുക്കുകയായിരുന്നെന്ന് സബ് ഡിവിഷണല്‍ പൊലീസ് ഓഫീസര്‍ സൗമ്യ ദേബര്‍മ്മ പറഞ്ഞു.
ലാത്തിച്ചാര്‍ജ് നടത്തിയാണ് ഇരുപാര്‍ട്ടികളിലെയും പ്രവര്‍ത്തകരെ സംഭവസ്ഥലത്തുനിന്ന് നീക്കിയതെന്നും പൊലീസ് അറിയിച്ചു. അനുമതി തേടാതെയാണ് ഇരുപാര്‍ട്ടികളും പരിപാടി സംഘടിപ്പിച്ചതെന്ന് പൊലീസ് വ്യക്തമാക്കി.
