ഇന്ത്യ ഒട്ടാകെ കാത്തിരിക്കുന്ന ചിത്രമാണ് പ്രഭാസ് നായകനാകുന്ന പ്രോജക്ട് കെ. വൈജയന്തി മൂവീസ് നിര്‍മിക്കുന്ന അമ്പതാമത്തെ ചിത്രം കൂടിയാണ് ഇത്. നാഗ് അശ്വിന്റെ സംവിധാനത്തില്‍ ഒരുങ്ങുന്ന ചിത്രം നിലവില്‍ പ്രൊഡക്ഷന്‍ ഘട്ടത്തിലാണ്. ചിത്രത്തിനായി പ്രത്യേക പ്രൊമോഷന്‍ ക്യാമ്പയിന്‍ തന്നെയാണ് നടക്കുന്നത്. ‘ഫ്രം സ്‌ക്രാച്ച്’ എന്ന പേരില്‍ പ്രീ – പ്രൊഡക്ഷന്‍ സമയത്ത് നടന്ന വര്‍ക്കുകളുടെ വീഡിയോ പുറത്തുവിടുകയാണ് അണിയറപ്രവര്‍ത്തകര്‍.
ആദ്യ എപ്പിസോഡ് ‘റി ഇന്‍വെന്റിങ്ങ് ദി വീല്‍’ എന്ന വീഡിയോ ഒരു പ്രത്യേക ഡിസൈനിലുള്ള വീല്‍ നിര്‍മിക്കുന്നതായിരുന്നു. ഈ വീഡിയോ നിമിഷനേരം കൊണ്ട് വൈറലായി മാറി. ഇപ്പോഴിതാ പ്രോജക്ട് കെ ടീം രണ്ടാമത്തെ എപ്പിസോഡ് ‘അസംബ്ലിങ് ദി റെയ്ഡേഴ്സ്’ വീഡിയോ പുറത്തുവിട്ടിരിക്കുകയാണ്. വില്ലന്റെ യൂണിഫോം ആര്‍മിയാണ് റെയ്ഡേഴ്സ്. നിര്‍മാതാവിന്റെ വാക്കുകള്‍ പ്രകാരം സിനിമയുടെ ഏറ്റവും ചെലവേറിയ ഭാഗവും ഇത് തന്നെയാണ്.
