ന്യൂദൽഹി: രാജ്യത്തുടനീളം വ്യാപകമായ പ്രതിഷേധങ്ങൾക്കും എതിർപ്പുകൾക്കും കാരണമായ 2025 ലെ വഖഫ് (ഭേദഗതി) നിയമത്തിന്റെ ഭരണഘടനാ സാധുതയെ ചോദ്യം ചെയ്യുന്ന ഹരജികൾ സുപ്രീം കോടതി ഇന്ന് പരിഗണിക്കും. നിയമം മൗലികാവകാശങ്ങളെ ലംഘിക്കുന്നുവെന്നും സ്വത്തുക്കൾ കണ്ടുകെട്ടാനുള്ള ശ്രമമാണെന്നും വിമർശങ്ങൾ ഉയരുമ്പോൾ, വഖഫ് സ്വത്തുക്കളുടെ നടത്തിപ്പിൽ സുതാര്യത ഉറപ്പാക്കുന്നതിന് ഭേദഗതി അനിവാര്യമാണെന്ന് സർക്കാർ വാദിക്കുന്നു.

ചീഫ് ജസ്റ്റിസ് സഞ്ജീവ് ഖന്ന, ജസ്റ്റിസ് സഞ്ജയ് കുമാർ, ജസ്റ്റിസ് കെ. വി. വിശ്വനാഥൻ എന്നിവരടങ്ങുന്ന മൂന്നംഗ ബെഞ്ചാണ് ഹരജികൾ പരിഗണിക്കുക. കോടതിക്ക് മുമ്പാകെ ആകെ 73 ഹരജികൾ ലിസ്റ്റ് ചെയ്തിട്ടുണ്ട്. ഇന്ന് (ബുധനാഴ്ച) ഉച്ചയ്ക്ക് രണ്ട് മണിക്ക് ഹരജികൾ പരിഗണിക്കും.

കോൺഗ്രസ്, തൃണമൂൽ കോൺഗ്രസ്, സി.പി.ഐ.എം, ജഗൻ മോഹൻ റെഡ്ഡിയുടെ വൈ.എസ്.ആർ.സി.പി, സമാജ്‌വാദി പാർട്ടി, നടൻ വിജയ്‌യുടെ ടി.വി.കെ, ആർ.ജെ.ഡി, ജെ.ഡി.യു, അസദുദ്ദീൻ ഒവൈസിയുടെ എ.ഐ.എം.ഐ.എം, എ.എ.പി, ഇന്ത്യൻ യൂണിയൻ മുസ്‌ലിം ലീഗ് തുടങ്ങിയ വിവിധ പാർട്ടികളിൽ നിന്നുള്ള നേതാക്കളാണ് ഹരജികൾ സമർപ്പിച്ചിരിക്കുന്നത്.

മുസ്‌ലിങ്ങളോട് വിവേചനം കാണിക്കുകയും മതവിശ്വാസത്തിനുള്ള അവരുടെ മൗലികാവകാശത്തെ ലംഘിക്കുകയും ചെയ്യുന്നുവെന്ന് ആരോപിച്ചാണ് നിയമത്തെ ചോദ്യം ചെയ്യുന്ന ഹരജികൾ സമർപ്പിച്ചിരിക്കുന്നത്.

അതേസമയം കേസിൽ ഇടപെടാൻ ആവശ്യപ്പെട്ട് ബില്ലിനെ പിന്തുണക്കുന്ന ബി.ജെ.പി അനുകൂല, ഏഴ് സംസ്ഥാനങ്ങൾ നിയമത്തെ പിന്തുണച്ച് സുപ്രീം കോടതിയെ സമീപിച്ചിട്ടുണ്ട്. വഖഫ് സ്വത്തുക്കളുടെ കാര്യക്ഷമവും ഉത്തരവാദിത്തമുള്ളതുമായ ഭരണം ഉറപ്പാക്കാൻ ഈ നിയമം ഭരണഘടനാപരമായി ശരിയാണെന്നും വിവേചനരഹിതമാണെന്നും അവർ വാദിക്കുന്നു.

മധ്യപ്രദേശ്, ഛത്തീസ്ഗഢ്, അസം, രാജസ്ഥാൻ ഉൾപ്പടെയുള്ള സംസ്ഥാനങ്ങളാണ് ബില്ലിനെ പിന്തുണച്ച് എത്തിയിരിക്കുന്നത്.

കേസിൽ കേന്ദ്ര സർക്കാർ ഒരു മുന്നറിയിപ്പ് ഫയൽ ചെയ്തിട്ടുണ്ട്. ഏതെങ്കിലും ഉത്തരവ് പുറപ്പെടുവിക്കുന്നതിന് മുമ്പ് ഒരു കക്ഷി തന്റെ വാദം കേൾക്കുന്നുണ്ടെന്ന് ഉറപ്പാക്കാൻ സമർപ്പിക്കുന്ന നിയമപരമായ നോട്ടീസാണ് മുന്നറിയിപ്പ്.

ഇരുസഭകളിലെയും ചൂടേറിയ ചർച്ചകൾക്കൊടുവിൽ പാർലമെന്റ് പാസാക്കിയ ശേഷം ഏപ്രിൽ അഞ്ചിന് രാഷ്‌ട്രപതി ദ്രൗപതി മുർമുവിന്റെ അംഗീകാരം ലഭിച്ച വഖഫ് ഭേദഗതി നിയമം സർക്കാർ അടുത്തിടെ വിജ്ഞാപനം ചെയ്തു. 128 അംഗങ്ങൾ അനുകൂലിച്ചും 95 അംഗങ്ങൾ എതിർത്തും വോട്ട് ചെയ്തുകൊണ്ട് രാജ്യസഭയിൽ ബിൽ പാസായി. 288 അംഗങ്ങൾ പിന്തുണച്ചും 232 പേർ എതിർത്തുമാണ് ലോക്സഭ ബിൽ പാസാക്കിയത്.

Content Highlight: Waqf Amendment Act legal battle begins, Supreme Court to hear 73 petitions today