താലിബാനിസം ഇസ്‌ലാമികമല്ല, അത് ലോകത്തിന് തന്നെ ഭീഷണിയാവും: ഡോ. ഹുസൈന്‍ മടവൂര്‍
ഡൂള്‍ന്യൂസ് ഡെസ്‌ക്
Monday, 23rd August 2021, 9:11 am
കോഴിക്കോട്: താലിബാനിസം ഇസ്‌ലാമികമല്ലെന്നും അത് ലോകത്തിന് തന്നെ ഭീഷണിയാവുമെന്നും പ്രമുഖ മുസ്‌ലിം പണ്ഡിതനും കോഴിക്കോട് പാളയം ജുമാ മസ്ജിദ് മുഖ്യ ഇമാമുമായ ഡോ.ഹുസൈന്‍ മടവൂര്‍.
അസ്ഥിരമായ രാഷ്ട്രീയ സാഹചര്യത്തില്‍ നിന്നുണ്ടായ അപക്വമായ ഒരു കൂട്ടായ്മയാണ് താലിബാന്‍ എന്നും താലിബാന്‍ പ്രവര്‍ത്തനങ്ങളുയര്‍ത്തിക്കാട്ടി ഇസ്‌ലാമിനെ വിമര്‍ശിക്കുകയും ലോക മുസ്‌ലിങ്ങളെ ഒന്നടങ്കം പ്രതിക്കൂട്ടിലാക്കാന്‍ ശ്രമിക്കുകയും ചെയ്യുന്ന മാധ്യമങ്ങളുടെ കുത്സിത പ്രവര്‍ത്തനങ്ങള്‍ പ്രതിഷേധാര്‍ഹമാണെന്നും അദ്ദേഹം പ്രസ്താവനയില്‍ പറഞ്ഞു.
ഇസ്‌ലാം ശാന്തിയുടെയും സമാധാനത്തിന്റെയും സന്ദേശമാണ് ഉയര്‍ത്തിപ്പിടിക്കുന്നത്. ജാതിമത വ്യത്യാസമില്ലാതെ എല്ലാ മനുഷ്യര്‍ക്കും സമാധാനവും സുരക്ഷയും ഉറപ്പുവരുത്തണമെന്നാണ് ഖുര്‍ആന്‍ പഠിപ്പിക്കുന്നതെന്നും ഹുസൈന്‍ മടവൂര്‍ പറഞ്ഞു.
