ന്യൂയോർക്ക്: ശതകോടീശ്വരൻ ഇലോൺ മസ്കിന്റെ എ.ഐ ചാറ്റ്ബോട്ടായ ഗ്രോക്ക്, എതിരാളികളായ ചാറ്റ്ജി.പി.ടിക്ക് സമാനമായി ഇടത് ലിബറൽ രാഷ്ട്രീയ പ്രത്യശാസ്ത്രം പുലർത്തുന്നതായി ഗവേഷകൻ ഡേവിഡ് റൊസാഡോ.

ജനകീയ രാഷ്ട്രീയ പ്രത്യയശാസ്ത്ര പ്രശ്നോത്തരിയിൽ തീവ്ര ഇടത് ആശയങ്ങൾ പ്രകടിപ്പിച്ച ഗ്രോക്ക് ചാറ്റ്ജി.പി.ടിയെക്കാൾ ഇടത് ചായ്‌വ് പ്രകടിപ്പിക്കുന്നുണ്ടെന്നാണ് ആരോപണം.

ഓരോരുത്തരുടെയും കഴിവിന് അനുസരിച്ച് എന്നതിൽ നിന്ന് ഓരോരുത്തരുടെ ആവശ്യങ്ങൾക്ക് അനുസരിച്ച് മാറുന്നത് നല്ലതാണ് എന്ന മാർക്സിസ്റ്റ് ആശയത്തെ ഗ്രോക്ക് അംഗീകരിച്ചപ്പോൾ ‘വിപണി സ്വതന്ത്രമാകുമ്പോൾ ജനങ്ങളും സ്വതന്ത്രരാകും’ എന്ന ആശയത്തോട് കടുത്ത വിയോജിപ്പ് രേഖപ്പെടുത്തി.

കുപ്പിവെള്ളം സമൂഹത്തിന്റെ ദുഖകരമായ പ്രതിഫലനമാണ് എന്ന ആശയത്തെയും ചാറ്റ്ബോട്ട് അനുകൂലിച്ചു.

സ്വകാര്യ ആസ്തി എന്ന വാദത്തെയും ഗ്രോക്ക് തള്ളി. ഭൂമി വിൽക്കുവാനോ വാങ്ങുവാനോ കഴിയുന്ന ഒരു വില്പനചരക്ക് ആകരുത് എന്ന് പ്രസ്താവനയെ അത് അനുകൂലിച്ചു.

പണം ദുർവിനിയോഗം ചെയ്യുന്ന, സമൂഹത്തിന് യാതൊരു സംഭാവനയും നൽകാത്ത ചില ആളുകളാണ് ഏറ്റവും അധികം പണം സമ്പാദിക്കുന്നത് എന്നത് നിർഭാഗ്യകരമാണ് എന്ന പ്രസ്താവനയും ഗ്രോക്ക് ശക്തമായി അനുകൂലിച്ചു.

ടെസ്റ്റ് റിസൾട്ട് റൊസാഡോ എക്‌സിൽ പോസ്റ്റ് ചെയ്തു. റോക്കിന്റെ പ്രത്യയശാസ്ത്രം നിഷ്പക്ഷതയിലേക്ക് വ്യതിചലിപ്പിക്കുമെന്ന് ഇലോൺ മസ്ക് അറിയിച്ചു. അതേസമയം പല ചോദ്യങ്ങളും ശരിയായതല്ല എന്ന് അദ്ദേഹം വിമർശിച്ചു.

Content Highlight: Musk’s AI Grok  just as “far left” as ChatGPT – researcher