കൊല്‍ക്കത്ത: കര്‍ഷക വിരുദ്ധമായ കാര്‍ഷിക നിയമങ്ങള്‍ പിന്‍വലിച്ചില്ലെങ്കില്‍ രാജ്യ വ്യാപകമായ പ്രക്ഷോഭം നടക്കുമെന്ന് മുന്നറിയിപ്പുമായി പശ്ചിമ ബംഗാള്‍ മുഖ്യമന്ത്രി മമത ബാനര്‍ജി. ബി.ജെ.പി സര്‍ക്കാരിനെതിരെ രൂക്ഷവിമര്‍ശനമാണ് മമത ഉന്നയിക്കുന്നത്. ട്വിറ്ററിലൂടെയായിരുന്നു മമതയുടെ വിമര്‍ശനം.
‘കര്‍ഷകരെ കുറിച്ച് എനിക്ക് വലിയ ആശങ്ക തോന്നുന്നുണ്ട്. അവരുടെ ജീവിതത്തെയും ജീവനോപാധിയെക്കുറിച്ചും എനിക്ക് ആശങ്കയുണ്ട്. കേന്ദ്ര സര്‍ക്കാര്‍ കര്‍ഷക വിരുദ്ധ നിയമങ്ങള്‍ പിന്‍വലിച്ചേ മതിയാകൂ. എത്രയും പെട്ടെന്ന് ഈ നിയമങ്ങള്‍ പിന്‍വലിച്ചില്ലെങ്കില്‍ ബംഗാളില്‍ മാത്രമല്ല, രാജ്യ വ്യാപകമായി പ്രക്ഷോഭം സംഘടിപ്പിക്കും. തുടക്കം മുതല്‍ തന്നെ ഞങ്ങള്‍ കാര്‍ഷിക നിയമത്തെ അതിശക്തമായി എതിര്‍ത്തിരുന്നു.’ മമത ട്വീറ്റ് ചെയ്തു.
എസന്‍ഷ്യല്‍ കൊമോഡോറ്റീസ് ആക്ട് സാധാരണക്കാരായ ജനങ്ങളെ ഗുരുതരമായി ബാധിക്കുമെന്നും അവശ്യ വസ്തുക്കളുടെ വില കുതിച്ചുയുരുന്നതിന് ഇടയാക്കുമെന്നും മമത ചൂണ്ടിക്കാട്ടി. കാര്‍ഷിക നിയമത്തെക്കുറിച്ച് ചര്‍ച്ച ചെയ്യുന്നതിനായി ഡിസംബര്‍ നാലിന് തൃണമൂല്‍ കോണ്‍ഗ്രസിന്റെ ദേശീയ തല യോഗം വിളിച്ചു ചേര്‍ത്തിട്ടുണ്ടെന്നും മമത അറിയിച്ചു.
I am very much concerned about the farmers, their lives and livelihood. GOI must withdraw the anti-farmer bills. If they do not do so immediately we will agitate throughout the state and the country. From the very start, we have been strongly opposing these anti-farmer bills.
— Mamata Banerjee (@MamataOfficial) December 3, 2020
രാജ്യത്തിന്റെ സമ്പത്ത് ബി.ജെ.പിയുടെ സ്വകാര്യ സ്വത്താക്കി മാറ്റാന്‍ അനുവദിക്കരുതെന്നും സര്‍ക്കാരിന്റെ സ്വകാര്യവത്കരണ നയങ്ങളെ കുറ്റപ്പെടുത്തികൊണ്ടു മമത പറഞ്ഞു. ‘കേന്ദ്ര സര്‍ക്കാര്‍ എല്ലാം വിറ്റുമുടിക്കുകയാണ്. റെയില്‍വേയും എയര്‍ ഇന്ത്യയും കല്‍ക്കരിയും ബി.എസ്.എന്‍.എല്ലും ബി.എച്ച്.ഇ.എല്ലും ബാങ്കും പ്രതിരോധവും നിങ്ങള്‍ക്ക് വില്‍ക്കാനുള്ളതല്ല. ദുഷ്ടലാക്കോടെ നടപ്പിലാക്കിയ സ്വകാര്യവത്കരണ നയങ്ങളും പിന്‍വലിക്കണം. രാജ്യത്തിന്റെ സമ്പത്ത് ബി.ജെ.പിയുടെ സ്വകാര്യ സ്വത്തായി മാറാന്‍ നാം അനുവദിക്കരുത്.’ മമത പറഞ്ഞു.
