നിര്‍ഭയ കേസിലെ നാല് പ്രതികളെയും തൂക്കിലേറ്റിയതിന് പിന്നാലെ വിചിത്ര പരാമര്‍ശവുമായി ബാബ രാംദേവ്. വിദ്യാഭ്യാസ സിലബസില്‍ യോഗ ഉള്‍പ്പെടുത്തിയാല്‍ ഇത്തരം പ്രവണതകള്‍ കുറയ്ക്കാമെന്നാണ് രാംദേവിന്റെ നിര്‍ദ്ദേശം.
‘കുറ്റവാളികളെ തൂക്കിലേറ്റിയതോടെ ചരിത്ര പരമായ നേട്ടമാണ് നീതിപീഠം നേടിയിരിക്കുന്നത്. ഇത്തരം കുറ്റകൃത്യങ്ങള്‍ ചെയ്യാനുള്ള പ്രവണതയുള്ളവര്‍ക്ക് ഇതൊരു പാഠമായിരിക്കട്ടെ. ഇത് രാജ്യത്തെ ലോകത്തിന് മുന്നില്‍ മോശമായി ചിത്രീകരിക്കാനും കാരണമായി. യോഗയും മോറല്‍ സ്റ്റഡീസും പാഠഭാഗങ്ങളില്‍ ഉള്‍പ്പെടുത്താന്‍ തയ്യാറായാല്‍ ഇത്തരം കുറ്റകൃത്യങ്ങളെ ഒഴിവാക്കാന്‍ കഴിയും’, രാംദേവ് പറഞ്ഞു.
ഇന്ന് പുലര്‍ച്ചെ 5.30നാണ് പ്രതികളെ തൂക്കിലേറ്റിയത്. പ്രതികളായ പവന്‍ ഗുപ്ത, മുകേഷ് സിങ്, വിനയ് കുമാര്‍ ശര്‍മ്മ, അക്ഷയ് കുമാര്‍ എന്നിവരുടെ വധശിക്ഷയാണ് നടപ്പിലാക്കിയത്. പട്യാല ഹൗസ് കോടതിയുടെ മരണവാറന്റില്‍ തിഹാര്‍ ജയിലിലാണ് പ്രതികളെ തൂക്കിലേറ്റിയത്. രാജ്യത്ത് ആദ്യമായാണ് നാല് പ്രതികളെ പേരെ ഒരുമിച്ച് തൂക്കിലേറ്റുന്നത്.
