പുല്ലുപാറ: ഇടുക്കി പുല്ലുപാറയില്‍ കെ.എസ്.ആര്‍.ടി.സിയുടെ ഉല്ലാസ യാത്ര ബസ് താഴ്ചയിലേക്ക് വീണു. നിലവില്‍ രക്ഷാപ്രവര്‍ത്തനം തുടരുകയാണ്. ബസില്‍ 34 പേരുണ്ടെന്നാണ് വിവരം.

മാവേലിക്കരയില്‍ നിന്ന് വിനോദയാത്ര പോയ സംഘമാണ് അപകടത്തില്‍പ്പെട്ടത്. ഫയര്‍ഫോഴ്‌സും നാട്ടുകാരും ചേര്‍ന്നാണ് രക്ഷാപ്രവര്‍ത്തനം നടത്തുന്നത്. പുലര്‍ച്ചെ ആറരയോടെയാണ് അപകടം ഉണ്ടായത്.

ബസിന്റെ ബ്രേക്ക് നഷ്ടപ്പെട്ടത് അപകടത്തിന് കാരണമായെന്നാണ് പ്രാഥമിക നിഗമനം. തഞ്ചാവൂര്‍ പോയി തിരിച്ചുവരുന്നതിനിടെയാണ് അപകടം നടന്നത്.

ബസിലുണ്ടായിരുന്ന പകുതിയിലധികം ആളുകളെ ബസില്‍ നിന്ന് പുറത്ത് എത്തിച്ചിട്ടുണ്ട്. പരിക്കേറ്റവരെ മുപ്പത്തിയഞ്ചാം മൈലിലുള്ള സ്വകാര്യ ആശുപത്രിയിലേക്കാണ് മാറ്റുന്നത്. പരിക്ക് ഗുരുതരമല്ലെന്ന് വിവരം.

ആംബുലന്‍സുകള്‍ സ്ഥലത്തെത്തിയിട്ടില്ലെന്നും വഴിയിലൂടെ കടന്നുപോകുന്ന വാഹനങ്ങളിലൂടെ പരിക്കേറ്റവരെ ആശുപത്രിയിലേക്ക് എത്തിക്കുകയാണെന്നും രക്ഷാപ്രവര്‍ത്തനം നടത്തുന്ന നാട്ടുകാര്‍ പറയുന്നു.

താഴ്ചയിലേക്ക് മറിഞ്ഞ കെ.എസ്.ആർ.ടി.സി ബസ് മരങ്ങളിൽ തട്ടിനിന്നതുകൊണ്ട് വലിയ അപകടം ഒഴിവായെന്നും നാട്ടുകാർ പ്രതികരിച്ചു.

Content Highlight: KSRTC bus plunges in Idukki; Rescue operation continues