‘പ്രണയ വിലാസം’ എന്ന ചിത്രത്തിലൂടെ പ്രേക്ഷകശ്രദ്ധ ആകർഷിച്ച ഹക്കീം ഷാജഹാനെ നായകനാക്കി നവാഗതനായ സജിൽ മമ്പാട് കഥയും സംവിധാനവും നിർവഹിക്കുന്ന ‘കടകൻ’ലെ ആദ്യ ഗാനം ‘ചൗട്ടും കുത്തും’ പുറത്തിറങ്ങി. ഗോപി സുന്ദറിന്റെ മനോഹര സംഗീതത്തിൽ എത്തിയ ഗാനം പ്രേക്ഷകർക്ക് ആവേശം പകരുന്ന വിധത്തിലാണ് ദൃശ്യാവിഷ്കരിച്ചിരിക്കുന്നത്. ഫോൾക്ക്ഗ്രാഫർ വരികൾ ഒരുക്കിയ ഈ ഗാനം ഫോൾക്ക്ഗ്രാഫറും സംഘവും ചേന്നാണ് ആലപിച്ചിരിക്കുന്നത്.
ദുൽഖർ സൽമാൻന്റെ ഉടമസ്ഥതയിലുള്ള വേഫറർ ഫിലിംസ് വിതരണത്തിനെത്തിക്കുന്ന ‘കടകൻ’ ഫെബ്രുവരി 23ന് തിയേറ്ററുകളിലെത്തും. ബോധിയും എസ്.കെ. മമ്പാടും ചേർന്ന് തിരക്കഥ രചിച്ച ഈ ചിത്രം ഫാമിലി എന്റർടൈനറാണ്. ഖലീലാണ് നിർമാതാവ്.
ഹരിശ്രീ അശോകന്‍, രഞ്ജിത്ത്, നിര്‍മല്‍ പാലാഴി, ബിബിന്‍ പെരുംമ്പിള്ളി, ജാഫര്‍ ഇടുക്കി, സോന ഒളിക്കല്‍, ശരത് സഭ, മണികണ്ഠന്‍ ആര്‍. ആചാരി, സിനോജ് വര്‍ഗീസ്, ഗീതി സംഗീത, ഫാഹിസ് ബിന്‍ റിഫായി, പൂജപ്പുര രാധാകൃഷ്ണന്‍, ദിനേശ് പ്രഭാകര്‍, കുളപ്പുള്ളി ലീല, പ്രതീപ് ബാലന്‍, മീനാക്ഷി രവീന്ദ്രന്‍, സൂരജ് തേലക്കാട്, ഉണ്ണിനായര്‍, വിജയ് കൃഷ്ണന്‍, തുടങ്ങിയവരാണ് മറ്റ് പ്രധാന വേഷങ്ങള്‍ കൈകാര്യം ചെയ്യുന്നത്.
