ടെസ്റ്റിനും ഏകദിന പരമ്പരക്കും ശേഷം വിന്‍ഡീസ് പര്യടനത്തിലെ ടി-20 പരമ്പരക്കാണ് ഇന്ത്യ കോപ്പുകൂട്ടുന്നത്. അഞ്ച് മത്സരങ്ങളടങ്ങിയ പരമ്പരയിലെ ആദ്യ മത്സരം വ്യാഴാഴ്ച ബ്രയാന്‍ ലാറ ക്രിക്കറ്റ് അക്കാദമി സ്റ്റേഡിയത്തില്‍ അരങ്ങേറും.
ഇന്ത്യ ടി-20 പരമ്പരക്കിറങ്ങുമ്പോള്‍ മലയാളി ക്രിക്കറ്റ് ആരാധകരെല്ലാം കാത്തിരിക്കുന്നത് സഞ്ജുവിന്റെ പ്രകടനത്തിനാണ്. ഏകദിന പരമ്പരയിലെ മൂന്നാം മത്സരത്തില്‍ അര്‍ധ സെഞ്ച്വറി തികച്ച സഞ്ജുവിന് ആദ്യ ടി-20യില്‍ അവസരം ലഭിക്കുമെന്നും താരം മികച്ച പ്രകടനം കാഴ്ചവെക്കുമെന്നുമാണ് ആരാധകര്‍ ഉറച്ചുവിശ്വസിക്കുന്നത്.
ടി-20 പരമ്പരക്കിറങ്ങുമ്പോള്‍ ഒരു റെക്കോഡും സഞ്ജുവിനെ കാത്തിരിക്കുന്നുണ്ട്. ടി-20 ഫോര്‍മാറ്റില്‍ 6,000 റണ്‍സ് തികയ്ക്കുന്ന താരങ്ങളുടെ പട്ടികയിലേക്കാണ് സഞ്ജു കണ്ണുവെക്കുന്നത്. വെറും 21 റണ്‍സ് കൂടിച്ചേര്‍ക്കാന്‍ സാധിച്ചാല്‍ സഞ്ജുവിന് ഈ നേട്ടം സ്വന്തമാക്കാന്‍ സാധിക്കും.
