വൈസ് പ്രസിഡന്റിനും ഇടപെടാമെന്ന് ഗണേഷിനോട് ഇടവേള ബാബു; ജോജു ജോര്‍ജ് വിഷയത്തില്‍ 'അമ്മ'യില്‍ ഭിന്നത
എന്റര്‍ടെയിന്‍മെന്റ് ഡെസ്‌ക്
Thursday, 4th November 2021, 7:14 pm
കൊച്ചി: ജോജു ജോര്‍ജ് വിഷയത്തില്‍ മലയാള സിനിമ അഭിനേതാക്കളുടെ സംഘടനയായ ‘അമ്മ’യില്‍ ഭിന്നത. ജോജു ജോര്‍ജ് തെരുവില്‍ ആക്രമിക്കപ്പെട്ടപ്പോള്‍ സംഘടനയില്‍ നിന്ന് ആരും ഇടപെട്ടില്ലെന്ന നടനും എം.എല്‍.എയുമായ ഗണേഷ് കുമാറിന്റെ ആരോപണത്തില്‍ മറുപടിയുമായി ജനറല്‍ സെക്രട്ടറി ഇടവേള ബാബു രംഗത്തെത്തി.
വിഷയത്തില്‍ സംഘടന ചെയ്യേണ്ട കാര്യങ്ങള്‍ എല്ലാം തന്നെ ചെയ്തു എന്ന് അദ്ദേഹം റിപ്പോര്‍ട്ടര്‍ ടി.വിയോട് പറഞ്ഞു.
‘ആ സമയത്ത് ചെയ്യേണ്ടതായ എല്ലാ കാര്യങ്ങളും ചെയ്തു. നമ്മള്‍ ആരും പിന്മാറിയില്ല. ബാബുരാജ്, ടിനി ടോം തുടങ്ങിയവര്‍ വിളിച്ചിരുന്നു. പിന്നെ ഗണേഷ് കുമാര്‍ വൈസ് പ്രസിഡന്റാണ്, പുള്ളിക്കും അതില്‍ ഇടപെടാം’ ഇടവേള ബാബു പറഞ്ഞു.
നേരത്തെ ‘അമ്മ’ സംഘടനയ്‌ക്കെതിരെ ഗണേഷ് രംഗത്തെത്തിയിരുന്നു. ‘അമ്മ’യുടെ ജനറല്‍ സെക്രട്ടറി ആരെ പേടിച്ചാണ് ഒളിച്ചിരിക്കുന്നതെന്ന് അദ്ദേഹം ചോദിച്ചിരുന്നു.
