ന്യൂദല്‍ഹി: കൊവിഡിന്റെ മൂന്നാം തരംഗം ഇന്ത്യയില്‍ ഓഗസ്റ്റ് അവസാനത്തോടെ സംഭവിച്ചേക്കാമെന്ന് ഐ.സി.എം.ആര്‍. റിപ്പോര്‍ട്ട്. ഇപ്പോള്‍ നിയന്ത്രണങ്ങള്‍ പിന്‍വലിക്കുന്നത് കൊവിഡ് വ്യാപനത്തിലേക്ക് നയിക്കാന്‍ സാധ്യതയുണ്ടെന്നും ഐ.സി.എം.ആറിലെ എപ്പിഡമോളജി ആന്‍ഡ് ഇന്‍ഫെക്ഷന്‍ ഡിസീസ് തലവന്‍ ഡോ. സമീരന്‍ പാണ്ടെ വ്യക്തമാക്കി.
വിവിധ കാരണങ്ങള്‍ മൂന്നാം കൊവിഡ് തരംഗത്തിന് കാരണമായേക്കാമെന്നാണ് ഐ.സി.എം.ആര്‍. മുന്നറിയിപ്പ് നല്‍കുന്നത്. ആദ്യ രണ്ട് തരംഗങ്ങളില്‍ നേടിയ രോഗപ്രതിരോധശേഷി കുറയുന്നതാണ് ഒരു കാരണം. ഇതില്‍ കുറവ് സംഭവിക്കുന്നത് കൊവിഡ് മൂന്നാം തരംഗത്തിലേക്ക് നയിച്ചേക്കാം.
പുതിയ കൊവിഡ് വകഭേദം രോഗപ്രതിരോധശേഷിയെ മറികടക്കുന്നതാണ് മറ്റൊരു അപകടസാധ്യത. രോഗപ്രതിരോധശേഷിയെ മറികടക്കാന്‍ സാധിച്ചില്ലെങ്കില്‍ ചിലപ്പോള്‍ വൈറസ് കൂടുതല്‍ വ്യാപനത്തിന് ശ്രമിച്ചു എന്നു വരാം. ഇതും മറ്റൊരു സാധ്യതയാണ്.
കൊവിഡ് വ്യാപനം കുറയുന്നതിന് മുന്‍പ് നിയന്ത്രണങ്ങള്‍ പിന്‍വലിക്കുന്നതും പ്രശ്നങ്ങള്‍ സൃഷ്ടിക്കും. ഡെല്‍റ്റ വകഭേദത്തില്‍ നിന്ന് ആരോഗ്യമേഖലയില്‍ ഇനി വലിയ വെല്ലുവിളി ഉണ്ടാകുമെന്ന് കരുതുന്നില്ലെന്നും അദ്ദേഹം പറഞ്ഞു. കഴിഞ്ഞ ദിവസം മൂന്നാം കൊവിഡ് തരംഗം രാജ്യത്ത് സംഭവിക്കുമെന്ന് ഇന്ത്യന്‍ മെഡിക്കല്‍ അസോസിയേഷനും മുന്നറിയിപ്പ് നല്‍കിയിരുന്നു.
