വാളയാറിലെ രക്ഷിതാക്കൾ സി ബി ഐ അന്വേഷണം ആവശ്യപ്പെടുന്നത് ഒരു പക്ഷേ ഇത്തരം കാര്യങ്ങൾ അറിയാത്തതു കൊണ്ടാവാം. രാഷ്ട്രീയ പാർട്ടികൾക്ക് പ്രതികൾ പിടിക്കപ്പെടുകയെന്ന ആത്മാർഥമായ ആഗ്രഹം ഉണ്ടെന്ന് ഒരു ഘട്ടത്തിലും ഇതുവരെ എനിക്കു തോന്നിയിട്ടില്ല. ഇത്തരം പ്രശ്നങ്ങൾ അവരുയർത്തുന്നതു തന്നെ എതിരാളികളെ നിഷ്പ്രഭമാക്കാനും വരാൻ പോകുന്ന തെരഞ്ഞെടുപ്പിൽ വോട്ടു കിട്ടാനും വേണ്ടി മാത്രമായിരുന്നു എന്നാണ് ഇതുവരെയുമുള്ള അനുഭവം. അതു കൊണ്ട് പ്രമാദമായ കേസുകളിൽ എപ്പോഴുമവർ സി ബി ഐ അന്വേഷണമെന്നു പറഞ്ഞു കൊണ്ടിരിക്കുക കേരളത്തിൽ പതിവുമാണ്. വാളയാർ കേസിന്റെ കാര്യത്തിലും അതാണ് സംഭവിച്ചുകൊണ്ടിരിക്കുന്നതെന്നു നാം ഭയക്കേണ്ടതുണ്ട്. കാരണം ഈ കേസിലും രാഷ്ട്രീയ സംഘടനകൾ രക്ഷിക്കാനാഗ്രഹിക്കുന്നവർ പ്രതിപ്പട്ടികയിൽ ഉൾപ്പെട്ടിട്ടുണ്ടെന്നാണ് വാളയാർ കേസിന്റെ നാൾവഴികൾ വ്യക്തമാക്കുന്നത്. അതിനാൽ സി ബി ഐ അന്വേഷണം പ്രസ്തുത പ്രതികളെ രക്ഷിച്ചെടുക്കാനുള്ള പതിനെട്ടടവും ഇവർ പയറ്റും .അതിൽ നിന്നു വേറിട്ട് സ്വതന്ത്രമായ ഒരു ഇച്ഛാശക്തിയോ കർത്തവ്യബോധമോ സ്ത്രീ പീഡനക്കേസുകളുടെ കാര്യത്തിൽ സിബിഐ അന്വേഷണത്തിന്റെ ഭാഗത്തുനിന്നുണ്ടായതായി ഇതുവരെ അനുഭവിക്കാൻ ഭാഗ്യമുണ്ടായിട്ടില്ല.

സിബിഐ അന്വേഷണം ആവശ്യപ്പെട്ടുകൊണ്ടുള്ള മാസ് പെറ്റിഷനുകൾ സാമൂഹ്യ മാധ്യമങ്ങളിലൂടെയും അല്ലാതെയും പല സുഹൃത്തുക്കളും നയിക്കുന്നതായി കണ്ട സാഹചര്യങ്ങളിലാണ് ഇക്കാര്യങ്ങളും തത്സംബന്ധമായ എന്റെ ആശങ്കകളും തുറന്നു പറയാമെന്നു വെച്ചത്.

മറ്റെന്ത് അന്വേഷണം എന്നാണെങ്കിൽ കേരളത്തിലെ തന്നെ നിഷ്പക്ഷരും പ്രഗത്ഭമതികളുമായ പോലീസുദ്യോഗസ്ഥരുടെ [ഉദാ: ഋഷിരാജ് സിങ്, മോഹനചന്ദ്രൻ ] ‘ഒരു പ്രത്യേക സംഘമുണ്ടാക്കി പുനരന്വേഷണത്തിന് ചുമതലപ്പെടുത്തുകയാണ് വേണ്ടതെന്നാണ് എനിക്കഭിപ്രായം.

വാര്‍ത്തകള്‍ ടെലഗ്രാമില്‍ ലഭിക്കാന്‍ ഇവിടെ ക്ലിക്ക് ചെയ്യൂ

ഞാൻ പോയ ദിവസങ്ങളിൽ കുട്ടികളുടെ അമ്മയോട് പുനരന്വേഷണത്തെക്കുറിച്ചു ചോദിച്ചപ്പോൾ ” അതാരെക്കൊണ്ടു വേണം ന്നൊന്നും ഞങ്ങൾക്കറീല്ലല്ലോ നിങ്ങളൊക്കെ പറഞ്ഞു തരിൻ ” എന്നാണവർ പറഞ്ഞത്. പിന്നീട് തത്ത പറയുന്നതുപോലെ സി ബി ഐ അന്വേഷണം സിബിഐ അന്വേഷണം എന്നവർ പറയുന്നതു മാധ്യമങ്ങളിൽക്കണ്ട് ഞാനതിശയിച്ചു. ആരാണിതവരെ പറഞ്ഞു പഠിപ്പിച്ചതെന്ന് .ഇതിനിടയിൽ വലിയ തോതിൽ അവരുടെ സ്വഭാവഹത്യ നടത്തിക്കൊണ്ടുള്ള സ്മിയർ ക്യാമ്പെയിനുകൾ പല ഭാഗത്തു നിന്നും ആരംഭിച്ചതായി നാം കണ്ടു. പ്രതികളെ രക്ഷപ്പെടുത്താനായി ആരൊക്കെയോ അവരെ പിന്തുടരുകയും സ്വന്തം അജണ്ടയിലേക്കു പരുവപ്പെടുത്തുകയും ചെയ്യുന്നുണ്ടെന്നു സംശയിക്കേണ്ടിയിരിക്കുന്നു. അല്ലെങ്കിൽ ദേശീയ ബാലാവകാശ കമ്മിഷൻ വരുന്ന അതേ ദിവസം തന്നെ അവരെ തിരുവനന്തപുരത്തേക്കു നയിച്ചതാരായിരിക്കും !

പ്രശ്നങ്ങൾ വളരെ സങ്കീർണ്ണമാണ് എന്നു മനസിലാക്കേണ്ടിയിരിക്കുന്നു. സ്ത്രീ, ദലിത്, കുട്ടി. മനുഷ്യർ എന്നീ നിലകളിലൊക്കെയുള്ള അവകാശങ്ങൾ നഷ്ടപ്പെട്ടവരാണ് വാളയാർ പെൺകുട്ടികൾ . കൊട്ടിയം, പൂവരണി കേസുകളിലെ പന്ത്രണ്ടുകാരികളെപ്പോലെ.

മേല്പറഞ്ഞ സാഹrചര്യങ്ങളിൽ സി ബി ഐ അന്വേഷണം വാളയാർ കേസ് പൂർണമായും തുടച്ചു വടിച്ച് പ്രതികളെ നൂറ്റൊന്നു ശതമാനം കുറ്റവിമുക്തരാക്കി പൊതു സമൂഹത്തിന്റെ ഈ ദൃശ ആപത്തുകളെ വർധിപ്പിക്കുമെന്നു ഞാൻ ഭയപ്പെടുന്നു. അതിനാൽ , ക്ഷമിക്കണം സുഹൃത്തുക്കളെ വാളയാർ കേസിൽ നിങ്ങളാവശ്യപ്പെട്ട സിബിഐ അന്വേഷണ ആവശ്യത്തോടൊപ്പം മറ്റൊരു ബോധ്യവും വിശ്വാസവും ആർജിക്കുന്നതു വരെ തല്കാലം ഞാൻ കണ്ണി ചേരുന്നില്ല.