സൗദിയില്‍ വീണ്ടും ഡ്രോണാക്രമണം; 10 പേര്‍ക്ക് പരിക്ക്
ഡൂള്‍ന്യൂസ് ഡെസ്‌ക്
Saturday, 9th October 2021, 6:53 pm
റിയാദ്: സൗദി അറേബ്യയില്‍ വീണ്ടും ഡ്രോണാക്രമണം. ജസാന്‍ നഗരത്തിലെ കിംഗ് അബ്ദുള്ള ബിന്‍ അബ്ദുള്‍ അസീസ് വിമാനത്താവളത്തിലാണ് ആക്രമണം നടന്നത്. യെമനുമായി അതിര്‍ത്തി പങ്കിടുന്ന മേഖലയിലാണ് ആക്രമണം നടന്ന വിമാനത്താവളം.
ആക്രമണത്തില്‍ 10 പേര്‍ക്ക് പരിക്കേറ്റെന്നാണ് റിപ്പോര്‍ട്ടുകള്‍. ആറ് സൗദി പൗരന്മാര്‍, 3 ബംഗ്ലാദേശികള്‍ ഒരു സുഡാന്‍ പൗരന്‍ എന്നിവര്‍ക്കാണ് പരിക്കേറ്റിട്ടുള്ളതെന്ന് റോയ്‌ട്ടേഴ്‌സ് റിപ്പോര്‍ട്ട് ചെയ്യുന്നു. പരിക്കേറ്റവരെ കുറിച്ചുള്ള കൂടുതല്‍ വിവരങ്ങള്‍ ലഭ്യമല്ല.
വിമാനത്താവളത്തെ ലക്ഷ്യമാക്കിയുള്ള ആക്രമണം തന്നെയാണ് ശനിയാഴ്ച നടന്നതെന്ന് സൗദിയിലെ വാര്‍ത്താ ഏജന്‍സിയായ സൗദി പ്രസ് ഏജന്‍സി (എസ്.പി.എ) റിപ്പോര്‍ട്ട് ചെയ്യുന്നു.
