കൊൽക്കത്ത: ഉംപൂൺ ചുഴലിക്കാറ്റ് കനത്ത നാശം വിതച്ച പശ്ചിമ ബം​ഗാൾ സന്ദർശിച്ച് പ്രധാനമന്ത്രി നരേന്ദ്ര മോദി. കൊവിഡ് ഉയർത്തിയ പ്രത്യേക സാഹചര്യത്തിൽ 83 ദിവസത്തിന് ശേഷമാണ് നരേന്ദ്രമോദി രാജ്യതലസ്ഥാനം വിട്ട് സഞ്ചരിക്കുന്നത്. കൊൽക്കത്ത എയർപോർട്ടിൽ പശ്ചിമ ബം​ഗാൾ മുഖ്യമന്ത്രി മമത ബാനർജിയും ​ഗവർണർ ജ​ഗ്ദീപ് ദങ്കാറും ചേർന്ന് മോദിയെ സ്വീകരിച്ചു.

ചുഴലിക്കാറ്റ് കനത്ത നാശം വിതച്ച പ്രദേശങ്ങൾ പ്രധാനമന്ത്രി ഹെലികോപ്റ്ററിൽ നിരീക്ഷിക്കും. ഇതിനു പുറമെ പ്രത്യേക അവലോകന യോ​ഗത്തിലും മോദി പങ്കെടുക്കും. പശ്ചിമ ബം​ഗാളിൽ നിന്നുള്ള കേന്ദ്ര മന്ത്രിമാരായ ദർമേന്ദ്ര പ്രധാൻ, ബാബുൽ സുപ്രിയോ, പ്രതാപ് ചന്ദ്ര സാരങ്കി, ദേബശ്രീ ചൗധരി എന്നിവരും പ്രധാനമന്ത്രിക്കൊപ്പം കൊൽക്കത്തയിൽ എത്തിയിട്ടുണ്ട്.

ഈ വർഷം ഇത് രണ്ടാം തവണയാണ് മോദി പശ്ചിമ ബം​ഗാൾ സന്ദർശിക്കുന്നത്. ഉത്തർപ്രദേശ് മാത്രമാണ് മോദി ഈ വർഷം രണ്ട് തവണ സന്ദർശിച്ച മറ്റൊരു സംസ്ഥാനം. പശ്ചിമ ബം​ഗാളിൽ വീശിയടിച്ച ഉംപൂൺ ചുഴലിക്കാറ്റിൽ 72 പേർ മരിച്ചുവെന്നാണ് കണക്കുകൾ. ഇതുവരെ ഉണ്ടാകാത്ത സാഹചര്യത്തിലൂടെയാണ് സംസ്ഥാനം കടന്നു പോകുന്നതെന്ന് മമത ബാനർജി പറഞ്ഞിരുന്നു. സംസ്ഥാനത്തിന് ഇപ്പോൾ കേന്ദ്ര സർക്കാരിന്റെ സഹായം ആവശ്യമാണെന്നും ഈ സമയത്ത് രാഷ്ട്രീയം കളിക്കരുതെന്നും മമത കഴിഞ്ഞ ദിവസം പറഞ്ഞിരുന്നു.