അപകടത്തിന് തൊട്ടുമുമ്പുള്ള കൊറോമണ്ഡല്‍ എക്‌സപ്രസിലെ അവസാന നിമിഷങ്ങള്‍; വീഡിയോ
ഡൂള്‍ന്യൂസ് ഡെസ്‌ക്
Thursday, 8th June 2023, 2:35 pm
ബലാസോര്‍: രാജ്യത്തിന്റെ ചരിത്രത്തിലെ എക്കാലത്തേയും വലിയ ട്രെയിന്‍ അപകടങ്ങളിലൊന്നായ ബലാസോറിലെ ട്രെയിന്‍ അപകടത്തിന്റേതെന്ന പേരില്‍ ഒരു വീഡിയോ സോഷ്യല്‍ മീഡിയയില്‍ പ്രചരിക്കുന്നു. അപകടത്തിന് തൊട്ടുമുമ്പുള്ള കൊറോമണ്ഡല്‍ എക്‌സപ്രസിലെ അവസാന നിമിഷങ്ങളുടെ വീഡിയോ വ്യാഴാഴ്ച രാവിലെയോടെയാണ് സോഷ്യല്‍ മീഡിയയില്‍ പ്രത്യക്ഷപ്പെട്ടത്. ഇന്ത്യന്‍ എക്സ്പ്രസ് ഉള്‍പ്പെടെയുള്ള ദേശീയ മാധ്യമങ്ങള്‍ ഈ വീഡിയോ പങ്കുവെച്ചിട്ടുണ്ട്.
ജൂണ്‍ രണ്ടിന് വൈകുന്നേരം അപകടത്തില്‍പ്പെട്ട കൊറോമണ്ഡല്‍ എക്സ്പ്രസ് ട്രെയിനിന്റെ എ.സി കമ്പാര്‍ട്ട്‌മെന്റില്‍ യാത്ര ചെയ്തിരുന്ന യാത്രക്കാരനാണ് ഈ വീഡിയോ പകര്‍ത്തിയത്. അപകടത്തിന് തൊട്ടുമുമ്പ് ആരംഭിച്ച് കൂട്ടിയിടി നടക്കുന്ന സമയത്തെ അലര്‍ച്ചകളും കൂട്ടക്കരച്ചിലുകളുമായി അവസാനിക്കുന്ന വീഡിയോക്ക് വെറും 27 സെക്കന്‍ഡ് മാത്രമാണ് ദൈര്‍ഘ്യമുള്ളത്.
