പോപ്പ് സംഗീത ലോകത്ത് പകരം വെക്കാനില്ലാത്ത വ്യക്തിയാണ് ടെയ്ലര് സ്വിഫ്റ്റ്. സ്വന്തം പേരില്‍ എപ്പോഴും പുതിയ റെക്കോഡുകള്‍ എഴുതി ചേര്‍ക്കുന്ന സ്വിഫ്റ്റ് ഇപ്പോള്‍ സ്പോട്ടിഫൈയില്‍ മറ്റൊരു റോക്കോഡ് കൂടെ തകര്‍ത്തിരിക്കുകയാണ്. ഇത്തവണ സ്വന്തം റെക്കോഡാണ് തകര്‍ത്തത് എന്നതാണ് പ്രത്യേകത.
സ്വിഫ്റ്റിന്റെ ‘1989 (ടെയ്ലേര്‍സ് വേര്‍ഷന്‍)’ ആണ് ഒറ്റ ദിവസം കൊണ്ട് ഏറ്റവും കൂടുതല്‍ സ്ട്രീം ചെയ്ത ആല്‍ബത്തിനുള്ള സ്പോട്ടിഫൈ റെക്കോര്‍ഡ് തകര്‍ത്തത്. ‘1989’ന്റെ പുതിയ വേര്‍ഷന്‍ കഴിഞ്ഞ ദിവസമായിരുന്നു സ്പോട്ടിഫൈയില്‍ സ്ട്രീം ചെയ്തത്.
സ്പോട്ടിഫൈ സ്ട്രീമിങ്ങിന്റെ ചരിത്രത്തില്‍ ഒരു ദിവസം ഏറ്റവും കൂടുതല്‍ സ്ട്രീം ചെയ്ത ആല്‍ബമാണ് സ്വിഫ്റ്റിന്റെ ‘1989 (ടെയ്ലേര്‍സ് വേര്‍ഷന്‍)’ എന്ന് സ്പോട്ടിഫൈ തന്നെ ശനിയാഴ്ച (ഒക്ടോബര്‍ 28) ഒഫിഷ്യല്‍ എക്‌സ് അക്കൗണ്ടിലൂടെ പുറത്തു വിടുകയായിരുന്നു.
ടെയ്ലര് സ്വിഫ്റ്റിന്റെ തന്നെ 2022ലെ ആല്‍ബമായ ‘മിഡ്നൈറ്റ്സ്’ ആയിരുന്നു മുമ്പ് ഈ റെക്കോഡ് നേടിയിരുന്ന ആല്‍ബം. ‘1989 (ടെയ്ലേര്‍സ് വേര്‍ഷന്‍)’ പുറത്തിറങ്ങിയതോടെ ഒറ്റ ദിവസം കൊണ്ട് ഏറ്റവും കൂടുതല്‍ സ്ട്രീം ചെയ്യപ്പെട്ട ആര്‍ട്ടിസ്റ്റായി സ്വിഫ്റ്റ് മാറിയെന്നും സ്പോട്ടിഫൈ പറയുന്നു.
