'പിണറായി കൊലപാതക കേസിലെ പ്രതി'; ക്രിമിനല്‍ പശ്ചാത്തലം ഉള്ള പ്രതിയാണ് അമിത് ഷായ്ക്ക് എതിരെ ആരോപണം ഉന്നയിക്കുന്നതെന്ന് കെ. സുരേന്ദ്രന്‍
ഡൂള്‍ന്യൂസ് ഡെസ്‌ക്
Tuesday, 9th March 2021, 1:41 pm
തിരുവനന്തപുരം: കേന്ദ്ര ആഭ്യന്തര മന്ത്രി അമിത് ഷായ്ക്ക് എതിരെ മുഖ്യമന്ത്രി പിണറായി വിജയന്‍ ഉന്നയിക്കുന്നത് വ്യാജ ആരോപണങ്ങളാണെന്ന് ബി.ജെ.പി സംസ്ഥാന അധ്യക്ഷന്‍ കെ. സുരേന്ദ്രന്‍.
അമിത് ഷായ്ക്ക് എതിരെ സി.ബി.ഐ. രാഷ്ട്രീയ പ്രേരിതമായിട്ടാണ് കേസ് എടുത്തതെന്നും കേരളത്തിലെ നേതാക്കളെ പോലെ നെഞ്ചുവേദന വന്നതായി അഭിനയിച്ചിട്ടില്ലെന്നും സുരേന്ദ്രന്‍ പരിഹസിച്ചു.
അമിത് ഷായെ കോടതി വെറുതെ വിട്ടതാണ്, മുഖ്യമന്ത്രി പിണറായി വിജയന്‍ ഒരു കൊലപാതക കേസില്‍ പ്രതിയാണെന്നും ക്രിമിനല്‍ പശ്ചാത്തലമുള്ള പ്രതിയാണ് അമിത് ഷായ്ക്ക് എതിരെ വ്യാജ ആരോപണം ഉന്നയിക്കുന്നതെന്നും അദ്ദേഹം പറഞ്ഞു.
