കൊച്ചി: തനിക്കെതിരെ സോഷ്യല്‍ മീഡിയയിലെ ഓണ്‍ലൈന്‍ പേജില്‍ വന്ന കുറിപ്പിനെതിരെ പരിഹാസവുമായി നടന്‍ നിരഞ്ജ് മണിയന്‍പിള്ള രാജു. ക്ലിക്ക് ബൈറ്റിനായി തെറ്റിധരിപ്പിക്കുന്ന തരത്തില്‍ വാര്‍ത്തയെന്ന പേരില്‍ കുറിപ്പ് പുറത്തുവിട്ട പേജുകള്‍ക്കെതിരെയാണ് നിരഞ്ജ് പ്രതിഷേധവുമായി രംഗത്ത് എത്തിയത്.
‘മണിയന്‍പിള്ള രാജുവിന്റെ മകന്‍ പൊലീസ് കസ്റ്റഡയില്‍’ എന്ന തരത്തിലായിരുന്നു ചില പേജുകളില്‍ വന്ന ‘വാര്‍ത്ത’. തന്റെ പുതിയ സിനിമയുടെ പ്രോമോഷന്റെ ഭാഗമായി നിരഞ്ജ് നല്‍കിയ ഒരഭിമുഖത്തില്‍ 2018ല്‍ പൊലീസില്‍ നിന്നും പെറ്റിയടിച്ചെന്ന് പറഞ്ഞ വാക്കുകളാണ് വളച്ചൊടിച്ച് ‘വാര്‍ത്ത’ എന്ന പേരില്‍ ചില പേജുകള്‍ നല്‍കിയത്.
ഇനി താന്‍ കുട്ടിക്കാലത്ത് മരത്തിലേക്ക് കല്ലെറിഞ്ഞിട്ടുണ്ടെന്ന് പറഞ്ഞാല്‍, മണിയന്‍പിള്ള രാജുവിന്റെ മകന്‍ ബഹിരാകാശത്തേക്ക് റോക്കറ്റ് വിട്ടെന്നു ഇവരൊക്കെ എഴുതുമോയെന്ന് നിര്ഞ്ജ് ചോദിച്ചു.
ഞാന്‍ പൊലീസ് കസ്റ്റഡിയില്‍ എന്നു പറഞ്ഞു കുറേ പേജുകളില്‍ വാര്‍ത്ത വരുന്നുണ്ട്. 2018ല്‍ ഒരു പെറ്റി അടിച്ചതിനെപ്പറ്റി ഒരഭിമുഖത്തില്‍ പറഞ്ഞതിനാണ് ഇങ്ങനെ. ഇനി ഭാവിയില്‍ ഞാന്‍ കുട്ടിക്കാലത്ത് മരത്തിലേക്ക് കല്ലെറിഞ്ഞിട്ടുണ്ടെന്ന് പറഞ്ഞാല്‍, മണിയന്‍പിള്ള രാജുവിന്റെ മകന്‍ ബഹിരാകാശത്തേക്ക് റോക്കറ്റ് വിട്ടെന്നു ഇവരൊക്കെ എഴുതുമോ?
