കേന്ദ്രം അയക്കുന്നത് കാത്തുനില്‍ക്കേണ്ട; സംസ്ഥാനം സ്വന്തം നിലയ്ക്ക് വാക്‌സിന്‍ വാങ്ങണമെന്ന് കേന്ദ്രമന്ത്രി വി. മുരളീധരന്‍
ഡൂള്‍ന്യൂസ് ഡെസ്‌ക്
Wednesday, 21st April 2021, 2:50 pm
ന്യൂദല്‍ഹി: കൊവിഡ് വാക്‌സിന്‍ കേന്ദ്രം അയക്കുന്നത് കാത്ത് സംസ്ഥാനങ്ങള്‍ നില്‍ക്കേണ്ടതില്ലെന്ന് കേന്ദ്രമന്ത്രി വി. മുരളീധരന്‍. സംസ്ഥാന സര്‍ക്കാര്‍ സ്വന്തം നിലയ്ക്ക് വാക്‌സിന്‍ വാങ്ങണമെന്നും വി. മുരളീധരന്‍ പറഞ്ഞു.
വാക്‌സിന്‍ ക്ഷാമമുണ്ടെന്ന് പറഞ്ഞ് ആരോഗ്യമന്ത്രി പരിഭ്രാന്തി പരത്തരുതെന്നും കേന്ദ്രമന്ത്രി പറഞ്ഞു. നാലുദിവസത്തിനകം ഏഴര ലക്ഷം വാക്‌സിന്‍ കേരളത്തിന് കിട്ടും. വാക്‌സിന്‍ നല്‍കേണ്ട ദിവസം നിശ്ചയിച്ചു കഴിഞ്ഞാല്‍ അനാവശ്യമായ തിരക്ക് കുറയ്ക്കാനാകും.
18 വയസു കഴിഞ്ഞവര്‍ക്ക് വാക്‌സിന്‍ കൊടുക്കുമ്പോള്‍ കൂടുതല്‍ വാക്‌സിന്‍ വേണ്ടി വരും. ജനങ്ങള്‍ക്ക് ആശങ്കയില്ലാത്ത വിധത്തില്‍ ഇപ്പോള്‍ വാക്‌സിന്‍ വിതരണം നടത്തുകയാണ് വേണ്ടത്. പരിഭ്രാന്തിയുണ്ടാക്കേണ്ട കാര്യമില്ല.
