ടോം ക്രൂസിന്റെ 'മിഷന്‍ ഇംപോസിബിള്‍'; അടുത്ത ഭാഗം 2024ല്‍ റിലീസിങ്ങിനെത്തില്ല
എന്റര്‍ടെയിന്‍മെന്റ് ഡെസ്‌ക്
Tuesday, 24th October 2023, 11:59 am
ഹോളിവുഡ് സിനിമാ പ്രേമികള്‍ ഏറെ പ്രതീക്ഷയോടെ കാത്തിരിക്കുന്ന സിനിമയാണ് ടോം ക്രൂസിന്റെ ‘മിഷന്‍ ഇംപോസിബിള്‍’. സിനിമയുടെ അടുത്ത ഭാഗം തിയേറ്ററുകളിലെത്തുന്നത് വൈകുമെന്നാണ് ഇപ്പോള്‍ ലഭിക്കുന്ന ഏറ്റവും പുതിയ വിവരം.
2024 ജൂണ്‍ 28നായിരുന്നു ‘മിഷന്‍: ഇംപോസിബിള്‍ – ഡെഡ് റെക്കണിംങ്ങ് പാര്‍ട്ട് റ്റു’ പുറത്തിറങ്ങേണ്ടിയിരുന്നത്. ഇനി 2025 മെയ് 23നാകും സിനിമ ബിഗ് സ്‌ക്രീനുകളില്‍ എത്തുകയെന്നാണ് റിപ്പോര്‍ട്ട്.
ജൂലൈ പകുതിയോടെ ഹോളിവുഡില്‍ ആരംഭിച്ചിരുന്ന സ്‌ട്രൈക്കുകള്‍ കാരണം നിര്‍മാണം നിര്‍ത്തിവെച്ചതാണ് സിനിമ വൈകുന്നതിന്റെ പിന്നിലെ കാരണമെന്നാണ് ദി ഹോളിവുഡ് റിപ്പോര്‍ട്ടര്‍ പറയുന്നത്. മിഷന്‍ ഇംപോസിബിളിന് പുറമെ ചില മാര്‍വല്‍ സിനിമകളും തിയേറ്ററിലെത്തുന്നത് വൈകുമെന്ന് ആഗോള മാധ്യമങ്ങള്‍ റിപ്പോര്‍ട്ട് ചെയ്യുന്നുണ്ട്.
ഇതുവരെ മിഷന്‍ ഇംപോസിബിളിന്റെ ഏഴ് ഭാഗങ്ങളാണ് റിലീസ് ചെയ്യപ്പെട്ടിട്ടുള്ളത്. 2023ലായിരുന്നു ക്രിസ്റ്റഫര്‍ മക്വറി (Christopher McQuarrie) എഴുതി സംവിധാനം ചെയ്ത ഏഴാമത്തെ ഭാഗമായ ‘മിഷന്‍: ഇംപോസിബിള്‍ – ഡെഡ് റെക്കണിംങ്ങ് പാര്‍ട്ട് വണ്‍ (Mission: Impossible – Dead Rockoning Part One)’ തിയേറ്ററുകളില്‍ എത്തിയിരുന്നത്.