ഡൂള്‍ന്യൂസ് ഡെസ്‌ക്4 hours ago
ഇംഗ്ലണ്ടിനെതിരെയുള്ള ടി-20 പരമ്പരയിലെ രണ്ടാം ടി-20 മത്സരത്തിലും തകര്‍പ്പന്‍ വിജയമാണ് ഇന്ത്യ സ്വന്തമാക്കിയത്. ഇതോടെ അഞ്ച് മത്സരങ്ങള്‍ അടങ്ങുന്ന പരമ്പരയില്‍ ഇന്ത്യ 2-0ന് ലീഡ് നേടിയിരിക്കുകയാണ്. ചെപ്പോക്കില്‍ നടന്ന പരമ്പരയിലെ രണ്ടാം മത്സരത്തില്‍ രണ്ട് വിക്കറ്റിന്റെ വിജയമാണ് ഇന്ത്യ സ്വന്തമാക്കിയത്.
ഇംഗ്ലണ്ട് ഉയര്‍ത്തിയ 166 റണ്‍സിന്റെ വിജയലക്ഷ്യം എട്ട് വിക്കറ്റ് നഷ്ടത്തിലും നാല് പന്ത് ശേഷിക്കെയും ഇന്ത്യ മറികടക്കുകയായിരുന്നു. തിലക് വര്‍മയുടെ മികച്ച പ്രകടനത്തിന് പിന്നാലെയാണ് ഇന്ത്യ വിജയം സ്വന്തമാക്കിയത്. 55 പന്തില്‍ നിന്ന് അഞ്ച് സിക്സറും നാല് ഫോറും ഉള്‍പ്പെടെ പുറത്താകാതെ 72 റണ്‍സാണ് തിലക് വര്‍മ അടിച്ചെടുത്തത്. 130.91 എന്ന സ്ട്രൈക്ക് റേറ്റിലായിരുന്നു താരത്തിന്റെ പ്രകടനം.
തിലക് തന്റെ മിന്നും പ്രകടനത്തില്‍ ഒരു തകര്‍പ്പന്‍ നേട്ടവും സ്വന്തമാക്കിയിരിക്കുകയാണ്. ടി-20ഐയില്‍ കഴിഞ്ഞ 10 ഇന്നിങ്‌സില്‍ നിന്ന് ഏറ്റവും കൂടുതല്‍ ആവറേജ് സ്വന്തമാക്കുന്ന താരമെന്ന നേട്ടമാണ് താരം സ്വന്തമാക്കിയത്. ഈ നേട്ടത്തില്‍ ഇന്ത്യന്‍ സൂപ്പര്‍ താരങ്ങളായ രോഹിത് ശര്‍മയേയും സഞ്ജു സാംസണേയുമെല്ലാം മറികടക്കാനാണ് താരത്തിന് സാധിച്ചത്.
തിലക് വര്‍മ – ഇന്ത്യ – 91.4 (164)
റിതുരാജ് ഗെയ്ക്വാദ് – ഇന്ത്യ – 60.1 (152)
രോഹിത് ശര്‍മ – 47.3 – ഇന്ത്യ – (162)
ഷായി ഹോപ് – വെസ്റ്റ് ഇന്‍ഡീസ് – 44.7 (166)
ഏഞ്ചലോ മാത്യൂസ് – ശ്രീലങ്ക – 44.7 (130)
സഞ്ജു സാംസണ്‍ – ഇന്ത്യ – 44.1 (185)
ട്രാവിസ് ഹെഡ് – ഓസ്‌ട്രേലിയ – 43.4 (189)
മത്സരത്തില്‍ ഒരേസമയം വിക്കറ്റ് സംരക്ഷിക്കുകയും റണ്‍സ് ഉയര്‍ത്തുകയും ചെയ്യേണ്ട സാഹചര്യത്തില്‍ പക്വതയോടെ ബാറ്റ് വീശിയാണ് തിലക് ഇന്ത്യയ്ക്ക് വിജയം സമ്മാനിച്ചത്. ഇതോടെ മത്സരത്തിലെ താരമാകാനും തിലകിന് സാധിച്ചു.
അടുത്തിടെ ടി-20യില്‍ മിന്നും പ്രകടനമാണ് താരം കാഴ്ചവെക്കുന്നത്. സൗത്ത് ആഫ്രിക്കയ്ക്കെതിരായ നാല് മത്സരങ്ങളുടെ ടി-20ഐ പരമ്പരയില്‍ തിലക് തുടര്‍ച്ചയായി രണ്ട് സെഞ്ച്വറികള്‍ നേടി ക്രിക്കറ്റ് ലോകത്തെ അമ്പരപ്പിച്ചിരുന്നു.
ഇതുവരെ ടി-20ഐയില്‍ 22 മത്സരത്തിലെ 21 ഇന്നിങ്‌സില്‍ നിന്ന് 707 റണ്‍സാണ് തിലക് നേടിയത്. 120 റണ്‍സിന്റെ ഉയര്‍ന്ന സ്‌കോര്‍ ഉള്‍പ്പെടെ രണ്ട് ബാക് ടു ബാക് സെഞ്ച്വറികളാണ് താരം നേടിയത്. മൂന്ന് അര്‍ധ സെഞ്ച്വറികളും തിലക് നേടിയിട്ടുണ്ട്.
Content Highlight: Tilak Varma In Great Record Achievement In T-20i
