കോഴിക്കോട്: വനിതാ മതിലിന് നല്‍കിയ പിന്തുണ പിന്‍വലിച്ച നടി മഞ്ജുവാര്യര്‍ക്ക് എതിരെ വിമര്‍ശനവുമായി സിന്ധു ജോയ്. വനിതാമതിലിന് മഞ്ജുവാര്യര്‍ ഒടി വെച്ചതാണെന്നും സിന്ധുജോയി പരിഹസിച്ചു.
ഫേസ്ബുക്കിലൂടെയായിരുന്നു സിന്ധുവിന്റെ പ്രതികരണം. ആദ്യം വാരിപ്പുണരുക, പിന്നെ തള്ളിപ്പറയുക”, അതാണ് മഞ്ജുവിന്റെ സ്വഭാവമെന്നും സിന്ധുജോയി പറയുന്നു.
അസലൊരു രാഷ്ട്രീയം ഈ നിലപാട് മാറ്റത്തിനു പിന്നിലുണ്ടെന്നും ദേശീയതലത്തില്‍ വാഗ്ദാനം ചെയ്യപ്പെടുന്ന ആദരവുകള്‍, അംഗീകാരങ്ങള്‍, അതിന്റെ ആരവങ്ങള്‍ എല്ലാം കണ്ട് കൊണ്ടാണ് ഇത്തരത്തില്‍ പിന്തുണ പിന്‍വലിച്ചതെന്നും ഇതിനെ വേണമെങ്കില്‍ അവസരവാദമെന്ന് വിളിക്കാമെന്നും സിന്ധുജോയി പറയുന്നു.
Also Read രാഹുല്‍ ഈശ്വര്‍ പൊലീസ് കസ്റ്റഡിയില്‍
വനിതാമതിലിന് രാഷ്ട്രീയമുണ്ടെന്നും എന്നാല്‍ അത് വെറും ചെങ്കൊടിയുടെ മാത്രം രാഷ്ട്രീയമാണെന്ന് താന്‍ കരുതുന്നില്ലെന്നും അത് പ്രതിരോധത്തിന്റെയും നവോത്ഥാനത്തിന്റെയും രാഷ്ട്രീയമാണെന്നും ഒപ്പം ഫാഷിസത്തിനെതിരായ പോരാട്ടമാണെന്നും സിന്ധു പറയുന്നു.
മഞ്ജുവിന് വേണ്ടി നേരത്തെ മുന്നിട്ടിറങ്ങിയ ഡബ്ല്യു.സി.സി എന്ന സംഘടനയെയും മഞ്ജുവിനെക്കാളും കഴിവുള്ള പാര്‍വ്വതിയെയും ഇത്തരത്തില്‍ മഞ്ജുവാര്യര്‍ തള്ളി പറഞ്ഞെന്നും സിന്ധുജോയി ആരോപിക്കുന്നു.
സിന്ധുവിന്റെ ഫെയ്സ്ബുക്ക് പോസ്റ്റ് പൂര്‍ണരൂപം,
വനിതാമതിലിന് മഞ്ജുവാര്യര്‍ “ഒടി”വെക്കുമ്പോള്‍
മലയാളിയുടെ “പെണ്ണത്ത”ത്തിന്റെ പ്രതീകമായി കുറേനാളായി വാഴ്ത്തപ്പെടുന്നുണ്ട് മഞ്ജു വാര്യര്‍; പ്രത്യേകിച്ചും അവരുടെ രണ്ടാംവരവിനുശേഷം! “വിമന്‍ ഇന്‍ സിനിമ കളക്ടീവ്” എന്ന പെണ്‍കൂട്ടായ്മയുടെ പിറവി തന്നെ പടിയിറങ്ങിപ്പോന്ന മഞ്ജുവിനൊരു പ്രതിരോധമതില്‍ പണിയാനായിരുന്നു എന്നതാണ് സത്യം. നടി ആക്രമിക്കപ്പെട്ട സംഭവം അതിനൊരു “വഴിമരുന്ന്” ആയെന്നുമാത്രം. നാല്‍പതാം വയസിലും നിലപാടുകളൊന്നുമില്ലാത്ത മഞ്ജു ആ മതിലും പൊളിച്ചു; പുറത്തുവന്ന് ഭള്ളുപറഞ്ഞത് അതിലേറെ കഷ്ടം. മഞ്ജുവിനെ പ്രതിരോധിക്കാനിറങ്ങിയ കഴിവുള്ളൊരു നടി ആ ഉദ്യമത്തില്‍ ബലിയാടായി; പാര്‍വതി. മഞ്ജുവിനേക്കാള്‍ ഒരുപാട് ഉയരങ്ങളില്‍ എത്തേണ്ടിയിരുന്ന ഒരു പ്രതിഭ. സിനിമയിലെ ആങ്ങളമാരുടെ സംഘടനയുടെ ഒരുകാതം അകലെയാണ് അവള്‍ ഇപ്പോള്‍; അവസരങ്ങളും നന്നേ കുറവ്.
“വനിതാ മതില്‍” ആണ് ഈ പെണ്ണൊരുത്തി ഇപ്പോള്‍ തള്ളിപ്പറയുന്ന സംഭവം.
“ആദ്യം വാരിപ്പുണരുക, പിന്നെ തള്ളിപ്പറയുക”, അതാണ് മഞ്ജുവിന്റെ സ്വഭാവം. മഞ്ജുവിന്റെ ഒരു വിഡിയോ യൂട്യൂബില്‍ കിടന്ന് കറങ്ങുന്നുണ്ട് : “നവോത്ഥാന മൂല്യങ്ങള്‍ സംരക്ഷിക്കണം. സ്ത്രീ-പുരുഷ സമത്വം അനിവാര്യം. മുന്നോട്ട് പോകട്ടെ കേരളം. ഞാന്‍ വനിതാ മതിലിനൊപ്പം.” ഇതായിരുന്നു ആഹ്വാനം!
നേരം ഇരുട്ടിവെളുത്തപ്പോള്‍ ആയമ്മ നിലപാട് മാറ്റി ഫെയ്‌സ്ബുക്കില്‍ കുറിപ്പിറക്കി: “സ്ത്രീകള്‍ക്കുവേണ്ടിയുള്ള ഒരു സര്‍ക്കാര്‍ ദൗത്യം എന്ന ധാരണയിലാണു വനിതാമതില്‍ എന്ന പരിപാടിക്ക് പിന്തുണ പ്രഖ്യാപിച്ചത്. പക്ഷേ അതിന് ഇതിനകം ഒരു രാഷ്ട്രീയ നിറം വന്നുചേര്‍ന്നത് ഞാന്‍ അറിഞ്ഞിരുന്നില്ല….പാര്‍ട്ടികളുടെ പേരില്‍ രാഷ്ട്രീയനിറമുള്ള പരിപാടികളില്‍നിന്ന് അകന്നുനില്‍കാനാണ് ഞാന്‍ ആഗ്രഹിക്കുന്നത്. ആ നിലപാടാണ് വനിതാമതിലിന്റെ കാര്യത്തിലുമുള്ളതെന്ന് വ്യക്തമാക്കട്ടെ.”
അസലൊരു രാഷ്ട്രീയം ഈ നിലപാട് മാറ്റത്തിനു പിന്നിലുണ്ട്, ദേശീയതലത്തില്‍ വാഗ്ദാനം ചെയ്യപ്പെടുന്ന ആദരവുകള്‍, അംഗീകാരങ്ങള്‍, അതിന്റെ ആരവങ്ങള്‍. ഇതിനെ വേണമെങ്കില്‍ അവസരവാദമെന്നും വിളിക്കാം.
വനിതാമതിലിനുമുണ്ട് രാഷ്ട്രീയം. അത് വെറും ചെങ്കൊടിയുടെ മാത്രം രാഷ്ട്രീയമാണെന്ന് ഞാന്‍ കരുതുന്നില്ല. അത് പ്രതിരോധത്തിന്റെ രാഷ്ട്രീയമാണ്, നവോത്ഥാനത്തിന്റെ രാഷ്ട്രീയമാണ്; ഒപ്പം ഫാഷിസത്തിനെതിരായ പോരാട്ടമാണ്.
കേരളത്തിന്റെ നവോത്ഥാനമുന്നേറ്റങ്ങളെ “ഒടി”വെക്കാന്‍ ശ്രമിക്കരുത്, അത് ആരായാലും…