ഉറുദുവില്‍ ഗസലെഴുതിയ സവര്‍ക്കര്‍ മുസ്‌ലിങ്ങള്‍ക്കതിരായിരുന്നില്ല; സവര്‍ക്കറെ വെള്ള പൂശാനുറച്ച് മോഹന്‍ ഭാഗവത്
ഡൂള്‍ന്യൂസ് ഡെസ്‌ക്
Wednesday, 13th October 2021, 9:14 am
ന്യൂദല്‍ഹി: സ്വാതന്ത്ര്യസമരകാലത്ത് ബ്രിട്ടീഷുകാര്‍ക്ക് മാപ്പെഴുതി കൊടുത്ത് തടവില്‍ നിന്ന് രക്ഷപ്പെട്ട സവര്‍ക്കറെ പ്രകീര്‍ത്തിച്ച് ആര്‍.എസ്.എസ് സര്‍സംഘ്ചാലക് മോഹന്‍ ഭാഗവത്.
സവര്‍ക്കര്‍ മുസ്‌ലിങ്ങള്‍ക്കെതിരായിരുന്നില്ലെന്നും അദ്ദേഹം ഉറുദു ഭാഷയില്‍ ഗസലുകള്‍ എഴുതിയിരുന്നതായും ഭാഗവത് അവകാശപ്പെട്ടു.
ഉദയ് മഹുര്‍ക്കര്‍ രചിച്ച വീര്‍ സവര്‍ക്കര്‍: ദി മാന്‍ ഹു കുഡ് ഹാവ് പ്രിവന്റഡ് പാര്‍ട്ടിഷന്‍, എന്ന പുസ്തകത്തിന്റെ പ്രകാശനച്ചടങ്ങില്‍ വെച്ചായിരുന്നു ഭാഗവതിന്റെ പ്രതികരണം.
സ്വാതന്ത്ര്യം ലഭിച്ചതിന് ശേഷം സവര്‍ക്കറെ അപമാനിക്കാന്‍ മനപൂര്‍വം ശ്രമം നടക്കുന്നതായും അദ്ദേഹം കൂട്ടിച്ചേര്‍ത്തു.
‘സവര്‍ക്കര്‍ ദേശീയവാദിയായിരുന്നു, വിവേചനത്തിനെതിരായിരുന്നു. അദ്ദേഹം ആളുകള്‍ ആരെ ആരാധിക്കുന്നു എന്ന് കണക്കാക്കി വിവേചനം കാണിച്ചിട്ടില്ല,’ മോഹന്‍ ഭാഗവത് പറഞ്ഞു.
