ലാഹോര്‍: പുല്‍വാമ ആക്രമണത്തെ ഇന്ത്യ രാഷ്ട്രീയ ലാഭത്തിന് ചൂഷണം ചെയ്യകയായിരുന്നവെന്ന ആരോപണവുമായി പാകിസ്ഥാന്‍ പ്രധാനമന്ത്രി ഷഹബാസ് ശരീഫ്. മേഖലക്ക് പ്രത്യാഘാതമുണ്ടാക്കുന്ന ബി.ജെ.പി സര്‍ക്കാരിന്റെ നടപടികള്‍ അന്താരാഷ്ട്ര സമൂഹം ശ്രദ്ധിക്കണമെന്നും ഷഹബാസ് ശരീഫ് പറഞ്ഞു. ട്വിറ്ററിലൂടെയായുരുന്നു അദ്ദേഹത്തിന്റെ പ്രതികരണം.
‘ഇന്ത്യന്‍ അധീന കശ്മീരിലെ മുന്‍ ഗവര്‍ണറുടെ വെളിപ്പെടുത്തലുകള്‍ പുല്‍വാമ വിഷയത്തിലുള്ള പാകിസ്ഥാന്റെ നിലപാടിനെ ശരിവെക്കുന്നതാണ്. പുല്‍വാമ സംഭവത്തിന്റെ യാഥാര്‍ത്ഥ്യത്തെക്കുറിച്ചാണ് അദ്ദേഹം സംസാരിക്കുന്നത്. ഇന്ത്യന്‍ സര്‍ക്കാര്‍ ഈ സാഹചര്യം രാഷ്ട്രീയ നേട്ടങ്ങള്‍ക്കുള്ള മുതലെടുപ്പിനായി ഉപയോഗിച്ചു,’ ഷഹബാസ് ശരീഫ് പറഞ്ഞു.
പുല്‍വാമ അറ്റാക്കില്‍ പാകിസ്ഥാന്‍ നിലപാടിനെ സാധൂകരിക്കുന്ന പ്രസ്താവനയാണ് സത്യപാല്‍ മാലിക് നടത്തിയതെന്ന് പാകിസ്ഥാന്‍ വിദേശകാര്യമന്ത്രാലയം ആരോപിച്ചിരുന്നു. ഇതിന് പിന്നാലെയാണ് ഷഹബാസ് ശരീഫ് തന്നെ വിഷയത്തില്‍ പ്രതികരിക്കുന്നത്.
ഭീകരാക്രമണത്തെ ഇന്ത്യ മനപൂര്‍വം പാകിസ്ഥാന്റെ തലയിലിടാനുള്ള ശ്രമമാണ് നടത്തിയതെന്നും രാഷ്ട്രീയ നേട്ടത്തിനായി ഭീകരാക്രമണത്തെ ഉപയോഗിച്ചെന്നുമാണ് പാകിസ്ഥാന്‍ വിദേശകാര്യ മന്ത്രാലയം പുറത്തിറക്കിയ പ്രസ്താവനയില്‍ പറഞ്ഞിരുന്നത്. സത്യപാലിന്റെ വെളിപ്പെടുത്തലിനെ നയതന്ത്രപരമായി നേരിടാനാണ് പാകിസ്ഥാന്‍ തീരുമാനമെന്നും വിദേശകാര്യാലയം പ്രസ്താവനയില്‍ പറഞ്ഞിരുന്നു.
Revelations by ex-Governor of IIOJK about reality of Pulwama incident & how Indian govt exploited situation for political gains vindicates Pakistan’s position. World should take note of India’s dangerous brinkmanship that could have led to disastrous consequences for the region.
— Shehbaz Sharif (@CMShehbaz) April 17, 2023
