സാമ്പത്തിക മാന്ദ്യം; മറികടക്കാന്‍ മോദി സര്‍ക്കാരിനോട് മൂന്ന് നിര്‍ദേശങ്ങളുമായി മന്‍മോഹന്‍ സിംഗ്
ഡൂള്‍ന്യൂസ് ഡെസ്‌ക്
Monday, 10th August 2020, 11:53 pm
ന്യൂദല്‍ഹി: രാജ്യത്ത് നേരത്തെ തന്നെയുള്ളതും കൊവിഡിനെ തുടര്‍ന്ന് കൂടുതല്‍ മോശമാവുകയും ചെയ്ത സാമ്പത്തിക പ്രതിസന്ധി പരിഹരിക്കുന്നതിന് മൂന്ന് പ്രധാന നിര്‍ദേശങ്ങളുമായി മുന്‍ പ്രധാനമന്ത്രി മന്‍മോഹന്‍ സിംഗ്. ജനങ്ങള്‍ക്ക് നല്ലൊരു തുക നേരിട്ട് പണമായി നല്‍കി അവരുടെ ഉപജീവന മാര്‍ഗങ്ങള്‍ സംരക്ഷിക്കുകയും അത് വഴി പണം ചെലവഴിക്കുന്നതിനും കഴിയുന്ന സ്ഥിതി കേന്ദ്രം ഉറപ്പാക്കണമെന്നതാണ് ഒന്നാമത്തെ നിര്‍ദേശമായി അദ്ദേഹം മുന്നോട്ട് വെച്ചത്.
സര്‍ക്കാര്‍ പിന്തുണയുള്ള ക്രെഡിറ്റ് ഗ്യാരണ്ടി പദ്ധതികള്‍ വഴി ബിസിനസുകള്‍ക്ക് മതിയായ മൂലധനം ലഭ്യമാക്കണമെന്നാണ് രണ്ടാമത്തെ നിര്‍ദേശം. സ്ഥാപനങ്ങളുടെ സ്വയംഭരണം അടക്കമുള്ള പ്രക്രിയകളിലൂടെ സാമ്പത്തിക മേഖലയെ ശക്തിപ്പെടുത്തണമെന്നാണ് മൂന്നാമത്തെ നിര്‍ദേശം.
