ഐ.എസ്.എല്ലിന്റെ രണ്ടാം പാദ പ്ലേ ഓഫ് മത്സരത്തില്‍ കരുത്തരായ ജംഷഡ്പൂരിനെ തളച്ച് കേരളം.1-1 എന്ന നിലയില്‍ സമനില നേടിയെങ്കിലും 2-1 അഗ്രഗേറ്റ് എന്ന സ്‌കോറിനാണ് ബ്ലാസ്റ്റേഴ്സ് ജംഷഡ്പൂരിനെ തോല്‍പിച്ചത്.
18ാം മിനിറ്റില്‍ ക്യാപ്റ്റന്‍ അഡ്രിയാന്‍ ലൂണയിലൂടെ മുന്നിലെത്തിയ കേരളം മത്സരത്തിലുടനീളം സമഗ്രാധിപത്യം പുലര്‍ത്താന്‍ ശ്രമിച്ചിരുന്നു. എങ്കിലും ജംഷഡ്പൂര്‍ അതിന് തടയിടുകയായിരുന്നു.
തുടക്കത്തില്‍ തന്നെ ആക്രമിച്ചുകളിച്ചാണ് ബ്ലാസ്റ്റേഴ്സ് ജംഷഡ്പൂരിനെ ഞെട്ടിച്ചത്. അത്തരത്തിലുള്ള ആക്രമണങ്ങള്‍ തന്നെയാണ് 18ാം മിനിറ്റില്‍ ഗോളിലേക്ക് വഴിവെച്ചതും.
THIS TEAM! 😍💛
SEE YOU IN FATORDA, YELLOW ARMY! 🟡#KBFCJFC #YennumYellow #KBFC #കേരളബ്ലാസ്റ്റേ pic.twitter.com/GZraLs4IeA
— K e r a l a B l a s t e r s F C (@KeralaBlasters) March 15, 2022
പ്ലേ ഓഫിന്റെ ആദ്യപാദത്തില്‍ 1-0 എന്ന ലീഡുമായാണ് ബ്ലാസ്റ്റേഴ്സ് കളത്തിലിറങ്ങിയത്. മലയാളി താരം സഹല്‍ നേടിയ ഗോളിന്റെ ബലത്തില്‍ സമനിലയായാലും കേരളം ഫൈനലിലെത്തുമായിരുന്നു. 2-1 എന്ന അഗ്രഗേറ്റ് സ്‌കോറിനാണ് ടീം ഫൈനലില്‍ പ്രവേശിച്ചത്.
അമ്പതാം മിനിറ്റിലായിരുന്നു ജംഷഡ്പൂരിന്റെ സമനിലഗോള്‍. കോര്‍ണറില്‍ നിന്നും പ്രണോയ് ഹല്‍ദാര്‍ ഗോള്‍ നേടി.
ബോക്സിലെ കൂട്ടപ്പൊരിച്ചിലിനിടിയില്‍ പ്രണോയ് ഹല്‍ദാര്‍ കൈകൊണ്ട് നിയന്ത്രിച്ച പന്ത് വലയിലേക്ക് തട്ടിയിടുകയായിരുന്നു. ഹാന്‍ഡ്ബോളിനായി ലെസ്‌കോവിച്ച് വാദിച്ചെങ്കിലൂം ഗുണമുണ്ടായില്ല.
