ആരാധകര്‍ കാത്തിരിക്കുന്ന ബിഗ് ബജറ്റ് മലയാള ചിത്രം കായംകുളം കൊച്ചുണ്ണിയുടെ ഫസ്റ്റ് ലുക്ക് പോസ്റ്റര്‍ ഇറങ്ങി. നിവിന്‍ പോളി നായകനായ കായംകുളം കൊച്ചുണ്ണിയായി എത്തുന്ന ചിത്രത്തിന്റെ ഫസ്റ്റ് ലുക്ക് പോസ്റ്ററിലും തിളങ്ങി നില്‍ക്കുന്നത് നിവിന്‍ പോളി തന്നെ. യുദ്ധക്കളത്തിലേക്ക് നീട്ടിപ്പിടിച്ച കത്തിയുമായി ഓടിയടുക്കുന്ന കേരളത്തിന്റെ റോബിന്‍ ഹുഡ് കായംകുളം കൊച്ചുണ്ണിയാണ് പോസ്റ്ററിലുള്ളത്.
45 കോടി മുതല്‍ മുടക്കില്‍ 161 ദിവസം കൊണ്ട് പൂര്‍ത്തീകരിച്ച കായംകുളം കൊച്ചുണ്ണിയുടെ പ്രാഥമിക ചര്‍ച്ചകള്‍ മുതലുള്ള വാര്‍ത്തകള്‍ വലിയ ആവേശത്തോടെയാണ് മലയാളി സിനിമ പ്രേക്ഷകര്‍ സ്വീകരിച്ചത്. കാത്തിരിപ്പുകള്‍ അവസാനിപ്പിച്ചുകൊണ്ട് ചിത്രം ഓണത്തിനു തിയറ്ററുകളിലെത്തുമെന്ന് അണിയറ പ്രവര്‍ത്തകര്‍ അറിയിച്ചിട്ടുണ്ട്.”
ഇത്തിക്കര പക്കിയായി അതിഥി വേഷത്തില്‍ മോഹന്‍ലാല്‍ എത്തുന്നത് ചിത്രത്തിന്റെ ഹൈപ് വര്‍ദ്ധിപ്പിക്കുന്നുണ്ട്. പക്കിയായി എത്തുന്ന മോഹന്‍ ലാലിന്റെ വ്യത്യസ്ത ലുക്കും ഏറെ ശ്രദ്ധ നേടിയിരുന്നു.
ബോബി സഞ്ചയ് കൂട്ടുകെട്ടിലെ തിരക്കഥ റോഷന്‍ ആന്‍ഡ്രൂസ് ആണ് സംവിധാനം ചെയ്യുന്നത്. ചിത്രത്തില്‍ പ്രിയ ആനന്ദാണ് നായിക. സണ്ണി വെയിന്‍, ബാബു ആന്റണി എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. ഗോകുലം ഗോപാലനാണ് മലയാളത്തിലെ ഈ ബിഗ് ബജറ്റ് ചിത്രം നിര്‍മ്മിച്ചിരിക്കുന്നത്.
കഴിഞ്ഞ ദിവസം ചിത്രത്തിലെ താരങ്ങളുടെ ലുക്കിനെ കുറിച്ചുള്ള രഹസ്യങ്ങള്‍ അണിയറ പ്രവര്‍ത്തകര്‍ വെളിപ്പെടുത്തിയ ഫേസ്ബുക്ക് കുറിപ്പ് വൈറലായിരുന്നു. കായംകുളം കൊച്ചുണ്ണിയെന്ന ഔദ്യോഗിക ഫേസ്ബുക്ക് പേജിലൂടെയായിരുന്നു രഹസ്യങ്ങള്‍ പുറത്ത് വിട്ടത്.
സിനിമയിലെ കേന്ദ്രകഥാപാത്രങ്ങള്‍ മുതല്‍ ജൂനിയര്‍ ആര്‍ട്ടിസ്റ്റുകള്‍ വരെയുള്ളവരുടെ ലുക്കുകള്‍ തിരഞ്ഞെടുത്തത് അതീവ ശ്രദ്ധയോടെയാണെന്ന് കായംകുളം കൊച്ചുണ്ണിയുടെ പ്രവര്‍ത്തകര്‍ വെളിപ്പെടുത്തിയിരുന്നു.
എല്ലാവരുടെയും സ്‌നേഹത്തിനും പിന്തുണയ്ക്കും നന്ദി പറഞ്ഞുകൊണ്ടാണ് ഫസ്റ്റ് ലു്ക്ക് പോസ്റ്റര്‍ നിവിന്‍ പോളി ഫേസ്ബുക്കില്‍ പങ്കുവെച്ചത്.