'യുവാക്കള്‍ക്കായി ഓണ്‍ലൈനില്‍ വല വിരിച്ച് ഐ.എസ്; താത്പര്യം പ്രകടിപ്പിക്കുന്നവരെ ഭീകര പ്രവര്‍ത്തനങ്ങള്‍ക്ക് ഉപയോഗിക്കും'; മുന്നറിയിപ്പുമായി എന്‍.ഐ.എ
ഡൂള്‍ന്യൂസ് ഡെസ്‌ക്
Friday, 17th September 2021, 10:25 pm
ഓണ്‍ലൈനിലൂടെയുള്ള ഐ.എസ് പ്രവര്‍ത്തനം ശ്രദ്ധയില്‍പ്പെട്ടാല്‍ 011-24368800 നമ്പറില്‍ ബന്ധപ്പെട്ടാനും എന്‍.ഐ.എ നിര്‍ദേശം നല്‍കിയിട്ടുണ്ട്.
ന്യൂദല്‍ഹി: ഭീകരസംഘടനയായ ഇസ്‌ലാമിക് സ്റ്റേറ്റിന്റെ പ്രവര്‍ത്തനം ഓണ്‍ലൈനിലൂടെയാണെന്ന് മുന്നറിയിപ്പ് നല്‍കി ദേശീയ അന്വേഷണ ഏജന്‍സി (എന്‍.ഐ.എ). ഓണ്‍ലൈനിലൂടെ യുവാക്കളെയാണ് ഐ.എസ് ലക്ഷ്യം വെക്കുന്നത് എന്നാണ് എന്‍.ഐ.എ നല്‍കുന്ന മുന്നറിയിപ്പ്.
ഫേസ്ബുക്ക്, ട്വിറ്റര്‍, ഇന്‍സ്റ്റഗ്രാം വഴിയാണ് ആശയങ്ങള്‍ ഐ.സ് പ്രചരിപ്പിക്കുന്നത് എന്നും ഐ.എസിന്റെ ആശയങ്ങളോട് താത്പര്യം പ്രകടിപ്പിക്കുന്നവരെ ഭീകര പ്രവര്‍ത്തനങ്ങള്‍ക്ക് ഉപയോഗിക്കുന്നുവെന്നും എന്‍.ഐ.എ പുറത്തിറക്കിയ വാര്‍ത്താക്കുറിപ്പില്‍ പറയുന്നു.
ഇതുമായി ബന്ധപ്പെട്ട 37 കേസുകള്‍ ഇതിനോടകം രജിസ്റ്റര്‍ ചെയ്തുവെന്ന് എന്‍.ഐ.എ അറിയിച്ചു. ഈ വര്‍ഷം ജൂണിലാണ് അവസാനമായി കേസ് രജിസ്റ്റര്‍ ചെയ്തത്.
