സ്പോര്‍ട്സ് ഡെസ്‌ക്20 min
തെഹ്‌രാന്‍: യു.എ.ഇ-ഇസ്രഈല്‍ ഔദ്യോഗിക നയതന്ത്ര ബന്ധത്തിന് ധാരണയയായതിനു പിന്നാലെ വിഷയത്തില്‍ പ്രതികരണവുമായി ഇറാന്‍ പ്രസിഡന്റ് ഹസ്സന്‍ റുഹാനി. യു.എ.ഇ ചെയ്തത് വലിയ പിഴവാണെന്ന് റുഹാനി ആരോപിച്ചു.
‘ അവര്‍ (യു.എ.ഇ) കരുതിയിരിക്കുന്നതാണ് നല്ലത്. അവര്‍ ഒരു വലിയ തെറ്റ് ചെയ്തു. വഞ്ചനാപരമായ പ്രവൃത്തി. അവരത് മനസ്സിലാക്കുകയും ഈ തെറ്റായ പാത ഉപേക്ഷിക്കുകയും ചെയ്യുമെന്ന് ഞങ്ങള്‍ പ്രതീക്ഷിക്കുന്നു,’ റുഹാനി പറഞ്ഞു.
നവംബറില്‍ നടക്കുന്ന യു.എസ് പ്രസിഡന്റ് തെരഞ്ഞെടുപ്പില്‍ പ്രസിഡന്റ് ട്രംപ് ജയിക്കുമെന്ന് ഉറപ്പു വരുത്തുന്നതിനായാണ് ഇത്തരമൊരു നീക്കം നടന്നതെന്നും റുഹാനി ആരോപിച്ചു.
വാഷിംഗ്ടണില്‍ വെച്ച് യു.എ.ഇ-ഇസ്രഈല്‍ സമാധാന കരാര്‍ പ്രഖ്യാപിച്ചത് ഇതിന്റെ സൂചനയാണെന്നും ഇദ്ദേഹം പറഞ്ഞു.
‘ എന്തു കൊണ്ടാണ് ഇത് ഇപ്പോള്‍ നടന്നത്? ഇതൊരു തെറ്റായ കരാറാല്ലെങ്കില്‍ എന്തിനാണ് മൂന്നാമതൊരു രാജ്യത്ത് വെച്ച് പ്രഖ്യാപനം നടന്നത്? അപ്പോള്‍ വാഷിംഗ്ടണിലെ ഒരു ജെന്റില്‍മാന് വോട്ടുകള്‍ നേടാനാവും,’റുഹാനി പറഞ്ഞു.
നേരത്തെ വിഷയത്തില്‍ പ്രതികരണവുമായി ഇറാനിയന്‍ റെവല്യൂഷണറി ഗാര്‍ഡ്് രംഗത്തെതിയിരുന്നു. ഇസ്രഈലുമായുള്ള സൗഹൃദത്തില്‍ യു.എ.ഇ ക്കെതിരെ ഇറാന്‍ വിമര്‍ശനങ്ങള്‍ തുടരുന്നതിനിടെയാണ് ഇറാന്റെ പ്രതികരണം വരുന്നത്.
മേഖലയില്‍ ഇറാന്‍ പൊതു ശത്രുവായി നിലനില്‍ക്കുന്ന സാഹചര്യത്തിലാണ് യു.എ.ഇയും ഇസ്രഈലും തമ്മില്‍ സമാധാന ഉടമ്പടിക്ക് ധാരണയായിരിക്കുന്നത്.
ഡൂള്‍ന്യൂസിനെ ഫേസ്ബുക്ക്, ടെലഗ്രാം,പേജുകളിലൂടെയും വാട്സാപ്പിലൂടെയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
