ഹരിയാനയിലും കര്‍ഷക സമരത്തിനിടയിലേക്ക് ബി.ജെ.പി എം.പിയുടെ കാര്‍ ഓടിച്ചു കയറ്റി; ഒരാള്‍ക്ക് പരിക്ക്
ഡൂള്‍ന്യൂസ് ഡെസ്‌ക്
Thursday, 7th October 2021, 3:27 pm
ചണ്ഡീഗഢ്: ഉത്തര്‍പ്രദേശിന് പിന്നാലെ ഹരിയാനയിലേയും കര്‍ഷക സമരത്തിനിടയിലേക്ക് കാര്‍ ഓടിച്ചു കയറ്റി. ബി.ജെ.പി എം.പി നയബ് സൈനിയുടെ കാറാണ് സമരത്തിനിടയിലേക്ക് ഓടിച്ചുകയറ്റിയതെന്ന് കര്‍ഷകര്‍ പറയുന്നു.
അപകടത്തില്‍ ഒരു കര്‍ഷകന് പരിക്കേറ്റിട്ടുണ്ട്. സംഭവത്തില്‍ ഉടന്‍ കേസെടുക്കണമെന്നും അല്ലെങ്കില്‍ ഒക്ടോബര്‍ 10 ന് പൊലീസ് സ്റ്റേഷന്‍ ഉപരോധിക്കുമെന്നും കര്‍ഷകര്‍ പറഞ്ഞു.
കുരുക്ഷേത്ര എം.പിയായ നയബ് സൈനിയും ഖനനമന്ത്രി മൂള്‍ ചന്ദ് ശര്‍മയും മറ്റ് നേതാക്കളും അംബാലയില്‍ ഒരു പരിപാടിയില്‍ പങ്കെടുക്കാന്‍ വന്നതായിരുന്നു. കാര്‍ഷിക നിയമത്തിനെതിരെ ഇവിടെ ദിവസങ്ങളായി കര്‍ഷകര്‍ സമരത്തിലാണ്.
പരിപാടി കഴിഞ്ഞ് നേതാക്കള്‍ മടങ്ങിപ്പോകുമ്പോഴാണ് കര്‍ഷകര്‍ക്കിടയിലേക്ക് കാര്‍ ഓടിച്ചുകയറ്റിയതെന്ന് കര്‍ഷകര്‍ പറയുന്നു.
