ഇനി ഒറ്റയ്ക്കാവാം; ഗോവയില്‍ സഖ്യകക്ഷികളെ ഒഴിവാക്കാനൊരുങ്ങി ബി.ജെ.പി; മന്ത്രിസ്ഥാനം രാജിവെയ്ക്കാന്‍ നിര്‍ദേശം
ഡൂള്‍ന്യൂസ് ഡെസ്‌ക്
Friday, 12th July 2019, 11:13 pm
പനജി: പ്രതിപക്ഷ നേതാവടക്കം പത്ത് കോണ്‍ഗ്രസ് എം.എല്‍.എമാരെ കിട്ടിയതോടെ സഖ്യകക്ഷികളെ ഒഴിവാക്കാനൊരുങ്ങി ഗോവ ബി.ജെ.പി. സഖ്യകക്ഷി മന്ത്രിമാരോട് രാജിവെയ്ക്കാന്‍ മുഖ്യമന്ത്രി പ്രമോദ് സാവന്ത് ആവശ്യപ്പെട്ടു.
കോണ്‍ഗ്രസില്‍ നിന്ന് ബി.ജെ.പിയില്‍ ചേര്‍ന്നവര്‍ക്ക് നാല് മന്ത്രിസ്ഥാനങ്ങള്‍ നല്‍കാന്‍ കഴിഞ്ഞദിവസം തീരുമാനിച്ചിരുന്നു. ഇതിനു പിന്നാലെയാണ് ഗോവ ഫോര്‍വേഡ് പാര്‍ട്ടിയുടെ മൂന്ന് മന്ത്രിമാരോടും ഒരു സ്വതന്ത്രനോടും രാജിവെയ്ക്കാന്‍ ആവശ്യപ്പെട്ടിരിക്കുന്നത്.
ആകെ 12 മന്ത്രിമാര്‍ മാത്രമാണ് ഗോവയിലുള്ളത്. ഇവരില്‍ എട്ടുപേരും ബി.ജെ.പിക്കാരാണ്.
പുതുതായി മന്ത്രിമാരാവുന്നത് ആരൊക്കെയാണെന്ന കാര്യം തീരുമാനിച്ചിട്ടില്ല. രാജിക്കാര്യത്തില്‍ ബി.ജെ.പി കേന്ദ്ര നേതൃത്വത്തോട് സംസാരിച്ചശേഷമേ തീരുമാനമെടുക്കൂ എന്നാണ് ഗോവ ഫോര്‍വേഡ് പാര്‍ട്ടിയുടെ നിലപാട്.
